Дар кӯчае, ки ӯ ба воя мерасид, ҳар рӯз кӯдакон ҷамъ омада, гӯштингирӣ менамуданд. Абдухолиқ, ки писараки чусту чолок ва дӯстдори варзиш буд, аз ин “маъракаҳо” худро канор намегирифт ва пайваста бо ҳамсолонаш ба варзиш машғул мегардид. Аз синни 5-солагӣ шавқу ҳаваси варзишгар шудан дар дилаш аланга мезад. Шавқу ҳаваси варзишгар шуданашро амакаш Қурбоналӣ Азизов дарк карда, ӯро ҳамроҳи худ ба толори варзишии Коллеҷи техникӣ бурд. Дар толори варзишӣ Хайрулло Иззатов ин навраси шавқманди соҳаи варзишро ба шогирдӣ қабул намуд. Аз ҳамон рӯз сар карда Абдухолиқ дар риштаи гӯштини ҷудо тамринро оғоз намуда, аввалин иштирокаш дар мусобиқаҳоро низ аз ҳамин толор оғоз кардааст, ки онро Абдухолиқ Азизов ҳаргиз фаромӯш намесозад. Зеро он нахустин қувваозмоии ӯ дар ҳаёти варзишиаш мебошад.

Абдухолиқ тӯли 8 сол зери роҳбарии мураббиаш ба тамрини гӯштини ҷудо ва самбо машғул гардида, дар ин солҳо ӯ чандин маротиба қаҳрамони кишвар миёни наврасон ва маротибаи охирин аз гӯштини самбо дар вазни 52 кг миёни наврасон қаҳрамони кишвар гардидааст. Пас аз ин пирӯзӣ Абдухолиқ аз гӯштини ҷудо ба самбои муҳорибавӣ мегузарад ва то имрӯз аз ин намуди варзиш ба комёбиҳои бузург мушарраф шудааст.

Ӯ сабаби гузариши худро аз гӯштини ҷудо ба самбои муҳорибавӣ чунин арзёбӣ намуд: “Дар тӯли ҳашт соле, ки ман дар ин намуди варзиш тамрин намудам, танҳо дар мусобиқаҳои ҷумҳуриявӣ дастболо гардидам. Ҳарчанд кӯшиш менамудам, ки ҳақи ширкат ба бозиҳои байналмилалиро ба даст орам, аммо он муяссарам намегардид. Аз ин лиҳоз, ба самбои муҳорибавӣ гузаштам ва то як андоза мавқеи худро дар ин намуди варзиш ёфтам”.

Абдухолиқ дар ин намуди варзиш фаъолияташро дар толори варзишии “Барқи Тоҷик” идома дода, соли 2012 аввалин роҳхат ба мусобиқаи байналмилалиро ба даст меорад. Мусобиқаи мазкур дар шаҳри Душанбе, бо ширкати варзишгарони панҷ давлати дунё: Тоҷикистон, Русия, Қазоқистон, Қирғизистон ва Ӯзбекистон баргузор гардид, ки он барои Абдухолиқ бобарор анҷом ёфт. “Маротибаи аввал буд, ки ман дар мусобиқаи калон рӯи гилеми набард баромада, бо рақибон қувваозмоӣ менамудам. Новобаста аз таҷрибаи кам доштанам тавонистам, ки ба ҳарифи ӯзбекистониям дастболо гардида, сазовори ҷои аввал шавам ва Парчами Тоҷикистонро дар миёни давлатҳои иштирокчӣ баланд бардорам, ки ин бароям ифтихори бузург аст”, - бо хушҳолӣ мегӯяд Абдухолиқ Азизов.

Абдухолиқ худи ҳамон сол ба Донишкадаи тарбияи ҷисмонии Тоҷикистон ба номи С. Раҳимов ҳуҷҷат супорида, сазовори номи донишҷӯ мегардад. Пас аз 1 сол, яъне, соли 2013 ӯ дар ҷумҳурӣ аз намуди самбои муҳорибавӣ мақоми аввалро касб менамояд. Баъдан, ӯ дар шаҳри Назрани Ингушистон дар мусобиқаи байналмилалӣ ширкат варзида, сазовори ҷои дуюм шуд. Ҳамон сол дар шаҳри Махачқалъаи Доғистон бо ширкати варзишгарон аз 4 давлат мусобиқа баргузор шуд, ки Абдухолиқ бар ҳарифонаш ғолиб омада, мақоми аввалро соҳиб шуд. Ин дастовардҳои варзишгари тоҷик беқадрдонӣ намонд. 19 декабри соли 2013 Абдухолиқ бо унвони Устоди варзиши Тоҷикистон сарфароз гардонда шуд.

“Дастовардҳои соли 2013 барои ман фаромӯшнашаванда аст. Бо дастгирии роҳбарияти Донишкада солҳои 2014-2015 дар мусобиқаҳои ҷумҳурӣ ҷойҳои намоёнро сазовор гардидам. Соли 2016 дар ноҳияи Сипитамени вилояти Суғд мусобиқаи ҷумҳуриявӣ оид ба намуди самбои муҳорибавии касбӣ баргузор гардид, ки дар он сазовори ҷои аввал шудам”, - мегӯяд Абдухолиқ Азизов.

Абдухолиқ барои боз ҳам бештар гардидани таҷрибаи варзишиаш ба шаҳри Берлини кишвари Олмон сафар намуд ва дар он ҷо як муддат дар варзишгоҳи “Гладиатор” тамрин кард. Пасон бо аъзои ин даста ба шаҳри Парижи Фаронса сафар намуд, вале дар рафти тамринҳо пояш лат хӯрда, аз мусобиқа маҳрум ва ба Ватан баргашт.

Абдухолиқ имрӯз донишҷӯи курси 5-уми Донишкадаи тарбияи ҷисмонии Тоҷикистон буда, ҳазамон шогирдони зиёд дорад, ки ба онҳо тамрин медиҳад. Ӯ нақша дорад, ки баъди хотимаи табобаташ ба мусобиқаи интихобии байналмилалӣ, ки 25-уми майи соли 2018 дар Баҳрайн баргузор мешавад, омода шуда, ҳамзамон ба бозиҳои ниҳоии чемпионати муҳорибаҳои омехта роҳ ёфта, қаҳрамони навъи варзиши муҳорибаҳои омехтаи дунё шавад, ки мо дар ин роҳ барояш барор хоҳонем.