Аз 25 то 28 январ дар Қасри варзишии шаҳри Хуҷанд чемпионати вилояти Суғд оид ба бокс байни наврасон роҳандозӣ гардид, ки дар он беш аз 100 нафар варзишгарон аз шаҳру ноҳияҳо иштирок намуданд.

Сардори Раёсати кор бо ҷавонон ва варзиши вилояти Суғд Исматзода Бахтиёр иброз дошт, ки мусобиқа бо мақсади рушду тарғиби варзиш дар байни наврасон, таҳкими тарзи ҳаёти солим, дарёфт ва омода намудани истеъдодҳои нав барои дастаҳои мунтахаби вилоят ва ҷумҳурӣ ташкил гардидааст.

Ба таъкиди номбурда, таваҷҷуҳи давлату Ҳукумати Ҷумҳурии Тоҷикистон, хусусан Пешвои миллат муҳтарам Эмомалӣ Раҳмон ба рушди соҳаи варзиш зиёд аст ва варзишгаронро зарур аст, ки аз ин шароит мақсаднок истифода намуда, кишвари худро дар арсаи ҷаҳон шоиста муаррифӣ намоянд.

Ба иттилои масъулон мусобиқа дар сатҳи зарурӣ сурат гирифта, иштирокчиён маҳорати хуби варзишӣ, иродаи қавӣ ва руҳияи баланди ватандӯстиро нишон доданд. Дар анҷом ғолибон ва ҷоизадорон бо диплом, медал ва ифтихорномаҳо қадрдонӣ карда шуданд.

Ёдовар мешавем, ки соли 2025 дар вилояти Суғд 115 мусобиқаву чемпионатҳои вилоятӣ баргузор гардиданд, ки ин чорабиниҳои варзишӣ ба як майдони рақобат, омӯзиши таҷриба табдил ёфт. Дар ин давра аз 139 мусобиқаи ҷумҳуриявӣ ва 72 мусобиқаи байналмилалӣ варзишгарони вилоят ба гирифтани 1 ҳазору 261 медали тилло, 1 ҳазору 347 медали нуқра ва 1 ҳазору 498 медали биринҷӣ мушарраф шуданд.

Субҳиддин ҚОДИРОВ, “ҶТ”