16 декабр дар Фурудгоҳи байналмилалии шаҳри Душанбе варзишгарбонуи тоҷик Миҷгона Самадоваро, ки аз мусобиқаи Ҷоми ҷаҳонии бокс бо медали тилло баргашт, масъулини соҳаи варзиши кишвар пешвоз гирифтанд.

Дар маросими пешвозгирии ин варзишгар Муҳаммадтолиб Шокирзода, сардори Раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Мавзуна Чориева, директори генералии Кумитаи миллии олимпӣ, намояндагони Вазорати корҳои дохилӣ, рӯзноманигорон, ҳамчунин як қатор варзишгарону дӯстдорони варзиш иштирок доштанд.

Ёдовар мешавем, ки Миҷгона Самадова дар мусобиқаи Ҷоми ҷаҳонии бокс, ки аз 5-ум то 10-уми декабри соли равон дар шаҳри Белоярски Федератсия Русия баргузор гардида буд, иштирок карда, дар рақобатҳо дар вазни то 57 кило медали тиллоро ба даст овард. Ин дуввумин медали ӯ аз ин мусобиқаи сатҳи ҷаҳонӣ буда, Миҷгона соли гузашта низ аз ин мусобиқа бо медали тилло ба ватан баргашта буд.

Таҳмина ЮСУФӢ, “ҶТ”