Дастаи мунтахаби ҷавонони то 19-солаи кишвар оид ба футбол аввалин бозии дӯстонаи худро дар доираи машқҳои таълимиву тамринӣ бо тими мунтахаби ҷавонони то 21-солаи Қирғизистон доир намуд.

Дидори мазкур 30 май дар варзишгоҳи ба номи Долен Умурзоқови шаҳри Бишкек ҷараён гирифта бо ҳисоби 1-5 ба фоидаи футболбозони тоҷик хотима ёфт.

Се голи мунтахаби ҷавонони кишварро ҳамлагари бошгоҳи “Истиқлол”-и шаҳри Душанбе Шериддин Бобоев вориди дарвозаи рақиб намуда, хетрик анҷом дод. Ду голи дигарро Кароматулло Саидов (аз зарбаи 11-метра) ва Шаҳром Самиев ба номи худ сабт намуданд.

Бозии ҷавобии дӯстона миёни дастаҳои мунтахаби ҷавонони Қирғизистон (U-21) ва Тоҷикистон (U-19) 2 июн баргузор мегардад.

Маврид ба зикр аст, ки дастаи мунтахаби то 19-солаи кишвар дар доираи омодагиҳои ба марҳилаи ниҳоии чемпионати Осиё-2018, зери роҳбарии Мубин Эргашев аз 27 май то 3 июн дар шаҳри Бишкек машқҳои таълимиву тамринӣ анҷом медиҳанд.

Дар марҳилаи ниҳоии чемпионати Осиё-2018, ки аз 18 октябр то 4 ноябри соли ҷорӣ дар Индонезия доир мешавад, тими мунтахаби ҷавонони Тоҷикистон дар гурӯҳи “D” бо дастаҳои Арабистони Саудӣ, Чин ва Малайзия вориди сабқат мегарданд.

Ёдовар мешавем, ки 4 дастаи беҳтарини чемпионати Осиё ба чемпионати ҷаҳон (U-20), ки соли оянда дар Лаҳистон баргузор мешавад, роҳхат мегиранд.