Имрӯз гурӯҳи калони даъватшавандагон аз шаҳру ноҳияҳои вилояти Суғд бо шодиву нишот ва ифтихормандии бепоён ба сафи Қувваҳои Мусаллаҳи Ҷумҳурии Тоҷикистон гусел карда шуданд.

Ба ин муносибат дар Амфитеатри МД "Қасри Арбоб" чорабинии бошукӯҳ бо иштироки ҳазорон нафар, аз ҷумла даъватшавандагон ва волидони онҳо, ҷавонону кормандони касбу кори гуногун баргузор гардид.

Раиси вилояти Суғд Раҷаб Аҳмадзода зимни суханронӣ иброз дошт, ки Артиши миллӣ рукни муҳими давлатдорӣ буда, ҳамчун сипари боэътимод дар ҳифзи марзу бум, оромиву осудагӣ ва ҳифзи арзишҳои миллӣ нақши муҳим дорад. Қувваҳои Мусаллаҳи Тоҷикистон бо ибтикори Президенти мамлакат муҳтарам Эмомалӣ Раҳмон бидуни пояҳои моддиву техникӣ таъсис ёфта, дар замони соҳибистиқлолӣ ба як неруи муқтадир ва сипари боэътимод табдил ёфт.

Гуфта шуд, ки беҳтар шудани шароити хизмат дар қисмҳои низомӣ, боло рафтани ҳисси ватандӯстӣ ва ифтихори миллӣ дар ниҳоди насли ҷавон боис ба он гардидааст, ки ҷавонони ватандӯст ихтиёрӣ ба хизмати Модар-Ватан раҳсипор мешаванд.
Дигар баромадкунандагон таъкид намуданд, ки хизмат дар сафи Артиши миллӣ мактаби матонат, ҷавонмардӣ ва сабақи ҳаёт буда, ҷавонон зимни хизмат руҳану ҷисман обутоб меёбанд.

Чорабинии гусели наваскарон дар вилояти Суғд бо иҷрои расму суннатҳои нек ва бо пешниҳоди барномаи рангини адабӣ-фарҳангӣ сурат гирифта, диловарони ватанро бо тантана ба хизмати ҳарбӣ гусел намуданд.

Субҳиддин ҚОДИРОВ, “ҶТ”