9 июл Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни сафари корӣ ба шаҳру ноҳияҳои вилояти Суғд дар шаҳри Истаравшан ба бунёди корхонаи истеҳсоли семент ва дар ноҳияи Бобоҷон Ғафуров корхонаи оҳак ба таври фосилавӣ оғоз бахшиданд.

Дар асоси дастуру супоришҳои роҳбари давлат муҳтарам Эмомалӣ Раҳмон ҶСП Комбинати металлургии Тоҷик тасмим гирифтааст, ки дар ҳудуди шаҳри Истаравшани вилояти Суғд корхонаи истеҳсоли сементро то соли 2029 сохта ва ба истифода диҳад.

Дар рафти ба амал баровардани корҳои сохтмонӣ беш аз 1200 сокини маҳаллӣ ба кори мавсимӣ ҷалб карда шуда, пас аз ба истифода додани корхона зиёда аз 850 ҷойи нави корӣ барои сокинони маҳаллӣ фароҳам оварда мешаванд.

Корҳои лоиҳакашӣ, таъмин, насб, ба истифода додан ва истеҳсоли тамоми таҷҳизот тибқи шартномаи байни ҶСП Комбинати металлургии Тоҷик ва ширкати SINOMA-и Ҷумҳурии Мардумии Чин роҳандозӣ хоҳад гашт.

Бояд қайд намуд, ки ширкати SINOMA-и Ҷумҳурии Мардумии Чин бузургтарин корпоратсияи давлатӣ ва муҳандисии байналмилалӣ мебошад, ки ба ҳайати ширкати Бузурги China National Building Materials Group дохил мешавад.

Инчунин, ширкати мазкур яке аз ташкилотҳои пешбари хидматрасонии ҷаҳонӣ дар соҳаи технологияи семент, таҷҳизот ва ҳамгироии системаҳои муҳандисӣ, корхонаи баландтехнологӣ ва инноватсионии Чин буда, барандаи ҷоиза дар соҳаи саноат мебошад.

Бо дарназардошти технологияи муосири истеҳсолӣ ва ашёи хоми истифодашаванда, сементи истеҳсолнамудаи корхона пурра ба талаботи меъёру стандартҳои ҷаҳонӣ мутобиқ буда, дар раванди истеҳсолот қоидаҳои экологӣ ва бехатарии муҳити зист таъмин карда мешаванд.

Иқтидори истеҳсолии корхонаи сементбарорӣ дар як сол 1,2 миллион тонна сементро ташкил дода, ҷараёни истеҳсолот аз майдакунӣ то ба бандубасти натиҷаи ниҳоии истеҳсоли маҳсулоти тайёр иборат хоҳад гашт.

Ҳадаф аз бунёди ин корхона зиёд намудани истеҳсоли семент, таъмини фаровонию арзонии ин маҳсулот дар бозори дохилӣ ва таъсиси ҷойҳои нави корӣ барои мардум мебошад. Бунёди ин корхона дар шароити имрӯза аҳамияти баланд дорад, зеро дар вилояти Суғд чун дар ҳамаи минтақаҳои кишвар бо вусъати зиёд ёфтани корҳои созандагию ободонӣ ва рушди иқтисодӣ талабот ба семент хеле афзудааст.

Дар доираи татбиқи ҳадафҳои стратегии давлат дар самти рушди босуръати саноат ва иҷрои дастуру ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, дар вилояти Суғд боз як тарҳи муҳими истеҳсолӣ амалӣ мегардад.

Ҷамъияти саҳомии пӯшидаи Комбинати металлургии тоҷик тасмим гирифтааст, ки то соли 2029 дар ҳудуди ноҳияи Бобоҷон Ғафуров, дар наздикии кони оҳаки Сафедсанг, ҳамчунин корхонаи муосири истеҳсоли оҳакро бунёд ва мавриди истифода қарор диҳад.

Тибқи лоиҳа, иншооти нав дар майдони 10 гектар сохта шуда, маблағгузорӣ ва роҳандозии он аз ҷониби худи ҶСП Комбинати металлургии Тоҷик анҷом дода мешавад. Дар доираи ҳамкориҳои байналмилалӣ, корҳои лоиҳакашӣ, таъмини таҷҳизот, насбу васл ва ба истифода додани хатҳои истеҳсолӣ тибқи шартнома бо ширкати бонуфузи SINOMA-и Ҷумҳурии Мардумии Чин амалӣ хоҳанд шуд.

Иқтидори солонаи корхонаи нави истеҳсоли оҳак 200 ҳазор тоннаро ташкил медиҳад. Бо истифода аз технологияҳои муосир ва ашёи хоми баландсифат, маҳсулоти истеҳсолшаванда ба талаботи стандартҳои байналмилалӣ мутобиқ буда, имкони истифодаи васеъ дар соҳаҳои гуногуни саноатро фароҳам месозад.

Ҳамзамон, тамоми таҷҳизоти истеҳсолӣ мутобиқи меъёрҳои ҷаҳонӣ, ҳифзи муҳити зист ва талаботи бехатарии истеҳсолот интихоб гардида, дар ҷараёни фаъолияти корхона масъалаҳои коҳиши таъсири экологӣ ва истифодаи самараноки захираҳо дар маркази таваҷҷуҳ қарор хоҳанд гирифт.

Татбиқи ин тарҳ на танҳо ба рушди иқтидори истеҳсолии кишвар мусоидат мекунад, балки барои беҳтар гардидани сатҳи шуғли аҳолӣ низ заминаи мусоид фароҳам меорад. Дар марҳилаи сохтмон зиёда аз 500 сокини маҳаллӣ ба корҳои мавсимӣ ҷалб мешаванд. Баъди ба фаъолият оғоз кардани корхона беш аз 150 ҷойи кори доимӣ таъсис дода хоҳад шуд.

Маҳсулоти корхона пеш аз ҳама барои таъмини эҳтиёҷоти дохилии «Комбинати металлургии Тоҷик», аз ҷумла дар раванди истеҳсоли оҳан истифода мегардад. Ҳамзамон, қисми зиёдатии оҳак метавонад талаботи дигар корхонаҳои саноатии кишварро қонеъ сохта, дар оянда ба бозорҳои хориҷӣ низ содир карда шавад.

Масъулин чунин мешуморанд, ки татбиқи ин лоиҳаи муҳими саноатӣ метавонад дар самти таҳкими иқтидори истеҳсолии мамлакат, рушди саноати металлургия, афзоиши ҷойҳои нави корӣ ва густариши имкониятҳои содиротии Тоҷикистон саҳми назаррас гузорад.