Донишгоҳи байналмилалии сайёҳӣ ва соҳибкории Тоҷикистон ҷиҳати татбиқи дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти рақамикунонӣ дар якҷоягӣ бо шарикони хориҷӣ ҷараёни табдили муассиса ба “Донишгоҳи ҳушманд”-ро роҳандозӣ намудааст, ки айни ҳол унсурҳои алоҳидаи он мавриди истифода қарор гирифта истодаанд.

Дар ин хусус имрӯз - 2 феврал Убайдулло Сатторзода, ректори Донишгоҳ ба хабарнигорон иттилоъ дода, ҳамзамон зикр намуд, ки иқдоми мазкур имкон фароҳам меорад, ки тамоми самтҳои фаъолият ба таври рақамӣ идора шуда, мониторинги фаъолияти омӯзгорону донишҷӯён такмил ёбад ва стандартҳои муосири рақамикунонӣ татбиқ гарданд.

Айни замон дар ҳама зинаҳои таҳсилоти Донишгоҳ ва воҳидҳои сохтории он 692 гурӯҳи таълимӣ бо теъдоди 20 129 нафар ба таҳсил фаро гирифта шудаанд, ки нисбат ба соли гузашта бештар мебошад.

Вобаста ба ин гуфта шуд, ки раванди таҳсил дар Донишгоҳ бо дарназардошти эҳтиёҷоти муосири иқтисоди мамлакат пайваста такмил дода шуда, нақша ва барномаҳои таҳсилотӣ пурра таҷдиди назар гардида, аз 77 ба 101 ихтисос расонида шуд. Нақшаи қабули донишҷӯён ба донишгоҳи мазкур дар соли 2025 пурра иҷро гардида, тибқи нақшаи Маркази миллии тестӣ имсол зиёда аз 50 ҳазор нафар ин донишгоҳро интихоб кардаанд.

Айни ҳол, дар назди факултети гуманитарию педагогии Донишгоҳ ихтисоси рӯзноманигори байналмилалӣ фаъолият мекунад, ки дар он зиёда аз 60 нафар донишҷӯ ба таҳсил фаро гирифта шудааст. Мақсад аз таъсиси он омода кардани мутахассисони сатҳи байналмилалии ҷавобгӯ ба талаботи ҳам дохил ва ҳам хориҷи кишвар арзёбӣ мегардад.

- Соли 2025 Донишгоҳи байналмилалии сайёҳӣ ва соҳибкории Тоҷикистон бо иштироки фаъол дар рейтинги ҷаҳонии “Донишгоҳҳои сабз” ба қатори донишгоҳҳои беҳтарини ҷаҳон шомил гардида, дар кишвар мавқеи аввалро соҳиб шуд, - гуфт ректори Донишгоҳ.

Шаҳло ЭШОНОВА, “ҶТ”