СИЁСАТ
Душанбе 16 Ноябр 2026 04:03
12509
16 ноябр дар Театри вилоятии мусиқӣ-мазҳакавии ба номи Ато Муҳаммадҷонов бо ташаббуси Мақомоти иҷроияи ҳокимияти давлатии вилояти Хатлон ба муносибати Рӯзи Президенти Ҷумҳурии Тоҷикистон ва 34-солагии Иҷлосияи XVI Шурои Олӣ чорабинии тантанавӣ баргузор гардид.

Дар чорабинӣ муовини раиси вилояти Хатлон Абдулло Раҳмонзода, намояндагони мақомоти ҳифзи ҳуқуқ, роҳбарону кормандони ташкилоту муассисаҳои вилоятӣ ва шаҳрӣ, омӯзгорону донишҷӯён, фаъолон ва сокинони шаҳр иштирок намуданд.

Нахуст, паёми табрикии раиси вилояти Хатлон Давлаталӣ Саид аз ҷониби муовини раиси вилоят Абдулло Раҳмонзода ба самъи ҳозирин расонида шуд.

Дар паёми табрикӣ таъкид гардидааст, ки 16 ноябр дар саҳифаҳои таърихи давлатдории миллӣ ҳамчун санаи тақдирсоз ва оғози марҳилаи нави давлатсозиву давлатдорӣ ҷойгоҳи махсус дорад. Маҳз дар ҳамин рӯз, соли 1992, Иҷлосияи XVI Шурои Олии Ҷумҳурии Тоҷикистон ба кори худ оғоз намуда, дар шароити ниҳоят мураккаби сиёсӣ барои муайян намудани роҳи минбаъдаи давлат ва миллат замина гузошт. Ҳамчунин, 16 ноябри соли 1994 Президенти Ҷумҳурии Тоҷикистон муҳтарам Эмомалӣ Раҳмон бори нахуст дар назди халқу Ватан савганд ёд карданд.

Зикр гардид, ки дар он марҳилаи ҳассоси таърихӣ масъалаи ҳифзи давлатдории миллӣ, барқарор намудани сохти конститутсионӣ, таъмини сулҳу субот ва муттаҳид сохтани ҷомеа аз ҷумлаи вазифаҳои аввалиндараҷа ба ҳисоб мерафт. Бо талошҳои пайгирона ва сиёсати хирадмандонаи Пешвои миллат муҳтарам Эмомалӣ Раҳмон Тоҷикистон роҳи душвори расидан ба сулҳу ваҳдат ва таҳкими пояҳои давлатдории миллиро тай намуд.

Дар идомаи суханронӣ ба дастовардҳои даврони соҳибистиқлолӣ, таҳкими мавқеи Тоҷикистон дар арсаи байналмилалӣ, татбиқи ҳадафҳои стратегии миллӣ ва корҳои созандагию бунёдкорӣ дар кишвар таваҷҷуҳ зоҳир карда шуд. Таъкид гардид, ки таҷрибаи сулҳи тоҷикон имрӯз ҳамчун намунаи нодири ҳалли низоъ ва расидан ба ҳамдигарфаҳмии миллӣ аз ҷониби ҷомеаи ҷаҳонӣ эътироф гардидааст.

Ҳамзамон, дар паёми раиси вилоят саҳми Пешвои миллат дар рушди вилояти Хатлон махсус қайд гардида, зикр шуд, ки бо дастгириву ҳидоятҳои Сарвари давлат дар вилоят корҳои ободонию созандагӣ вусъати тоза гирифтанд. Ба истиқболи 35-солагии Истиқлоли давлатии Ҷумҳурии Тоҷикистон дар ҳудуди вилоят беш аз 8 ҳазор иншооти таъиноти гуногун бунёд ва мавриди истифода қарор гирифтааст.

Сипас, барномаи рангини фарҳангӣ-фароғатӣ пешниҳоди иштирокдорон гардид. Ҳунармандон бо иҷрои суруду таронаҳои дилнишин дар васфи Ватан, Пешвои миллат, сулҳу ваҳдат ва дастовардҳои даврони соҳибистиқлолӣ ба чорабинӣ шукуҳи хос бахшиданд.

С. САИДЗОДА, “ҶТ”

Эзоҳи худро нависед



Рамзҳо дар расм