Дар нимсолаи якуми соли 2026 дар корхонаҳо ва объектҳои зери назоратии Хадамоти назорати давлатии бехатарии корҳо дар саноат ва соҳаи кӯҳкорӣ ҳамагӣ 32 ҳодисаи нохуш ба қайд гирифта шудааст. Бар асари ин ҳодисаҳо 21 нафар ҳалок гардида, 19 нафари дигар ҷароҳатҳои гуногуни ҷисмонӣ бардоштаанд.

Дар ин бора имрӯз - 7 июл Мирзозода Ардашер, муовини якуми раиси Хадамоти назорати давлатии бехатарии корҳо дар саноат ва соҳаи кӯҳкорӣ зимни нишасти матбуотӣ иттилоъ дод.

Ба гуфтаи ӯ сабабҳои асосии рух додани ҳодисаҳои нохуш пеш аз ҳама бемасъулиятии муҳандисону кормандони техникии корхонаҳо ҳангоми иҷрои уҳдадориҳои хизматӣ, риоя нагардидани талаботи қоидаҳои бехатарии саноат, вайрон намудани технологияи коркарди конҳо ва норасоии мутахассисони соҳибихтисоси соҳа мебошанд.

Зикр гардид, ки бо мақсади муайян намудани омилҳои ба вуҷуд омадани чунин ҳодисаҳо аз ҷониби комиссияҳои тафтишотӣ санҷишҳои дахлдор гузаронида шуда, нисбат ба қонунвайронкунандагон чораҳои маъмурӣ андешида шуд.

Аз рӯи натиҷаи тафтишот барои роҳ додан ба қоидавайронкуниҳо нисбат ба 2 шахси ҳуқуқӣ, 33 шахси мансабдор ва 13 шахси воқеӣ ҷазои маъмурӣ дар шакли ҷарима таъин гардид. Маблағи умумии ҷаримаҳои таъиншуда вобаста ба ҳодисаҳои нохуш 153 ҳазору 960 сомониро ташкил додааст.