Дар нимсолаи аввали соли равон аз ҷониби мутахассисони Озмоишгоҳҳои таъмини бехатарии озуқавории Кумитаи бехатарии озуқавории назди Ҳукумати Ҷумҳурии Тоҷикистон дар бозорҳои истеъмолии ҷумҳурӣ ҳамагӣ 803 ҳазору 37 адад ташхисҳои маҳсулоти озуқаворӣ гузаронида шудааст, ки дар натиҷа миқдори муайяни маҳсулоти ба талабот ҷавобгӯ набуда ошкор гардидааст.

Дар ин бора Файзуллозода Маҳмадсаид, раиси кумитаи мазкур 7 июл зимни нишасти хабарӣ иттилоъ дод.

Гуфта шуд, ки дар натиҷаи ташхис 44 ҳазору 243,3 кг маҳсулоти гӯштӣ, 5ҳазору 809,3 литр маҳсулоти ширӣ, 1ҳазору 324, 3 литр равғани растанӣ, 22 ҳазору 933 дона тухми парранда, 603, 1 кг моҳӣ, 247 кг асал, 3 ҳазору 933 кг маҳсулоти намакин ҳамчун маҳсулоти бесифат ва хавфнок муайян гардида, фурӯшашон манъ ва нобуд карда шудаанд. Ҳамчунин 124 ҳазору 306, 5 кг меваю сабзавот ва 9 ҳазору 471 кг маҳсулоти полезӣ низ аз фурӯш боз дошта шудаанд.

Ҳамзамон таъкид гардид, ки дар ин давра ба марказҳои ташхиси бехатарии озуқавории ҷумҳурӣ 445 ҳазору 221 адад намунаи маводҳои амрозӣ ворид гардида, аз онҳо 554 натиҷа мусбӣ арзёбӣ гардидааст.