21 май дар шаҳру ноҳияҳои вилояти Суғд ба ифтихори Рӯзи ҷавонони Тоҷикистон роҳпаймоии идона ва ҳамоишҳои бошукуҳи фарҳангӣ баргузор гардид.

Дар ин рӯз ҷавонони хушиқболи даврони соҳибистиқлол, сокинони касбу кори гуногун бо руҳияи болида ва шукргузорӣ аз даврони соҳибистиқлолӣ дар чорабиниҳо фаъолона иштирок намуданд. Насли ҷавон хуб дарк намудааст, ки дар замони соҳибистиқлолӣ Ҳукумати Ҷумҳурии Тоҷикистон ба масъалаи дастгирии ҷавонон ва фароҳам оврадани шароити муносиби кору таҳсил ба ин қишри ояндасоз тамоми тадбирҳои заруриро амалӣ намудааст. Ин ҳама таваҷҷуҳ ва ғамхорӣ ҷавонони кишваро руҳбаланд намуда, онҳо дар ободии ватан, ҳифзи марзу бум ва пойдории сулҳу субот саҳми арзанда мегузоранд.

Зимни таҳнияти иштирокдорони чорабинӣ раисони шаҳру навоҳӣ ва дигар шахсони масъул аз таваҷҷуҳи рӯзафзуни Ҳукумати мамлакат, шароити фароҳамгардида ба ин қишри ояндасоз ва дигар тадбирҳои андешидашуда ёдовар шуданд. Бо қаноатмандӣ иброз гардид, ки имрӯз дар ҳамаи самту соҳаҳо ҷавонон кору фаъолият доранд ва саҳми онҳо дар рушди иқтисоди миллӣ, ҳифзи марзу бум, ба таври шоиста муаррифӣ намудани миллати тоҷик дар арсаи ҷаҳон назаррас мебошад.

Субҳиддин ҚОДИРОВ, “ҶТ”