Дар партави сиёсати хирадмандонаи Президенти мамлакат, муҳтарам Эмомалӣ Раҳмон шароиту имкониятҳои хеле беҳтар шудааст. Фаъолмандӣ ва дастовардҳои ин қишри ояндасоз буд, ки соли 2017 “Соли ҷавонон” эълон гардид. Дар зимн суҳбати хабарнигорамон бо Бахтиёр Исматҷонов, мудири Бахши кор бо ҷавонон ва варзиши шаҳри Хуҷанд, пешкаши хонанда мегардад.

- Перомуни “Соли ҷавонон” эълон гардидани соли 2017 чӣ назар доред?

- Ин боварӣ ва эътимоди Сарвари давлатамон ба ҷавонон, имрӯз аз ҳар як нафар ҷавон масъулияти баланди хештаншиносиро тақозо намуда, ҳар яки моро дар масъалаи истифодаи самараноки нерӯи созандаи ҷавонон, тарбияву интихоб ва ҷобаҷогузории кадрҳои ҷавону лаёқатманд ва соҳибмаърифат, тарғибу ташвиқи пайвастаи донишандӯзӣ ва камолоти ҷисмониву маънавии ҷавонон, тарзи ҳаёти солим, аз худ кардани касбу ҳунарҳои замонавӣ байни ҷавонон ва ҷомеа ҷиддан вазифадор менамояд.

- Чи гунае, ки медонем, Хуҷанд яке аз шаҳрҳои саноатӣ ва тиҷоратии кишвар маҳсуб мегардад. Дар ин ҷо фаъолияти ҷавонон то кадом андоза қаноатбахш аст?

- Ташаббусҳои созандаи ҷавонон аз ҷониби Ҳукумати кишвар ва ҳокимиятҳои маҳаллӣ ҳамеша дастгирӣ меёбад. Аз ҷумла, 75 нафар олимони ҷавон ва 29 нафар ихтироъкорони ҷавон дар донишгоҳҳо фаъолият бурда, саҳми арзандаи худро дар пешрафти ҷомеа мегузоранд. Ба маҷлиси вакилони халқи шаҳри Хуҷанд 7 нафар ҷавонон ҳамчун вакил интихоб гардида, сол то сол сафи ҷавононе, ки дар вазифаҳои масъули роҳбарӣ интихоб мешаванд, афзоиш меёбад. 100 нафар роҳбарони корхонаҳои хурди саноатиро соҳибкорони ҷавон ташкил медиҳанд. Соли сипаригашта аз тарафи соҳибкорони ҷавон 17 адад корхонаҳои саноатӣ таъсис дода шудааст. Ҳамчунин фарогирии ҷавонон ба соҳибкории хурду миёна тавсеа ёфта, бо ин мақсад аз ҷониби Ҳукумат лоиҳаҳои имтиёзнок ва дигар тадбирҳои судманд роҳандозӣ шудаанд.

- Сатҳи донишандӯзии ҷавонони шаҳрро чӣ гуна баҳо медиҳед?

- Хушбахтона, имрӯзҳо беш аз 12 ҳазор нафар ҷавонони соҳидистеъдоду лаёқатманди мо дар хориҷи кишвар аз ҳисоби давлат таҳсил карда истодаанд. Зиёда аз 365 нафар ҷавонписарону ҷавондухтарони шаҳрамон имрӯз дар муассисаҳои таҳсилоти олии касбии кишварҳои Русия, Хитой, Малайзия, Олмон, Англия, Фаронса, Дания ва Ирландия таҳсили илм доранд. Дастовардҳои шоистаи ҷавонони шаҳр дар соҳаҳои илму таҳсилот низ боиси ифтихору сарфарозии мост.

- Барои ҷавонони шаҳр кадом дастгириҳо роҳандозӣ шудааст?

- Мақомоти шаҳри Хуҷанд дар ҷодаи дастгирии насли ҷавон барои ба роҳ мондани ташаббусҳои навин ва созанда, татбиқи муваффақонаи сиёсати ҷавонон тадбирҳои зарурӣ меандешад. Таъсиси стипендияҳои президентӣ, раиси вилоят ва раиси шаҳр намунаи равшани дастгирии донишҷӯёну хонандагони фаъолу болаёқат маҳсуб мешавад. Аз ҷумла, 6 нафар хонандагон ба дарёфти стипендияи президентӣ, 30 нафар соҳиби стипендияи раиси вилоят ва 60 нафар ба гирифтани стипендияи раиси шаҳр мушарраф гардиданд.

- Дар соҳаи варзиш чӣ дастовардҳо доранд?

- Имрӯз ҷавонони мо барои иштирок ба мусобиқаҳои гуногуни сатҳи умумиҷаҳонӣ омодагӣ мебинанд. Боиси ифтихор аст, ки варзишгарон, ба монанди Ҷаҳон Қурбонов ду карат иштирокчии бозиҳои олимпӣ, Наврӯз Ҷафоев ғолиби чандин мусобиқаҳои байналхалқӣ дар намуди варзиши бокс, Ҷамшед Ғафуров ҷоизадори Чемпионати ҷаҳон оид ба бокс байни наврасон, Чемпионати Осиё, мусобиқаи байналмилалӣ барои дарёфти ҷоми “Дети Азии” ва соҳиби ҷои 1 дар мусобиқаи ҷумҳуриявӣ, Мирзодалер Хуршедзода соҳиби 2 медали тилло дар мусобиқаи байналмилалӣ оид ба ушу, Алишер Қаюмов ғолиби Ҷоми Ҷаҳон оид ба каратэ-до байни наврасон, Далер Баротов иштирокчии чемпионати Ҷоми Ҷаҳон оид ба каратэ-до номи Тоҷикистону тоҷикистониёнро дар арсаи ҷаҳон муаррифӣ менамоянд. Дастовардҳои варзишгарон гувоҳи он аст, ки ҷавонон ҳамеша дар боло рафтани эътибори кишвари азизи мо дар сатҳи ҷаҳонӣ саҳми арзанда мегузоранд.

- Ҳамчун як ҷавони муваффақи кишвар ба ҷавонон чӣ таманниёте доред?

- Вазъияти ҷаҳони имрӯза моро водор мекунад, ки ба қадри давлати соҳибистиқлол ва зиндагии орому осуда расида, ҳеҷ гоҳ зиракии сиёсиро аз даст надиҳем ва ҳаргиз фирефтаи таблиғоту ақидаҳои бебунёди ифротӣ нашавем. Аз ин лиҳоз, ҷавононро лозим аст, ки бо истифода аз тамоми имконият ва шароите, ки давлат ва Ҳукумати мамлакат барои мо дар таҳсил, кору фаъолият, фароғату беҳдошти сатҳи зиндагӣ ва маърифатнокӣ омода ва пешниҳод намудааст, самаранок истифода намуда, пеш аз ҳама сатҳи дониш ва маърифатнокии худро боло бардорем ва ташаббускору созанда бошем. Пайваста дар роҳи ташаккули ҳаматарафа ва солимии ҷисмониву маънавии худ кӯшиш ба харҷ дода, бо ҷидду ҷаҳди комил дар роҳи дуруст ба камол расида, тамоми ҳастӣ ва нерӯи ҷавонии худро барои саодати миллат ва ободии диёр равона намоем.

Хуршед ХОВАРӢ “ҶТ”