18 - уми сентябр таҳти ин унвон дар доираи нақша - чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Кохи фарҳангии “Истиқлол”-и шаҳри Гулистони вилояти Суғд ҳамоиши ҷавонони шаҳр бо иштироки гирандагони Стипендияи президентӣ, стипендияи раиси шаҳр, ғолибони озмунҳои ҷумҳуриявӣ, ҷавонони фаъоли муассисаҳои таълимӣ, донишҷӯёни Коллеҷи тиббии шаҳр ва ҷавонони соҳаҳои касбу кори гуногун баргузор гардид.

Тибқи иттилоъ, ҳамоиш бо садо додани Суруди миллии Ҷумҳурии Тоҷикистон ифтитоҳ ёфта, таҳти раёсати Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Илҳом Пулотзода, раиси шаҳри Гулистон ва Бахтиёр Исматзода, сардори Раёсати кор бо ҷавонон ва варзиши вилояти Суғд доир шуд.

Зимни суҳбат бо ҷавонон ироа гардид, ки Истиқлоли давлатии Ҷумҳурии Тоҷикистон барои ноил шудан ба дастовардҳои муҳим дар ҳаёти иқтисодиву иҷтимоӣ, сиёсиву фарҳангии ҷавонон нақши босазо гузошта, ба ташаккули сиёсати давлатии ҷавонон ва тадриҷан фароҳам овардани имкониятҳои васеи рушду такомули ҷавонон дар шароити мураккаби тағйирёбии сохториву ҷамъиятӣ мусоидат намуд, ки саҳми ҷавонон дар ин раванд хеле самарабахш арзёбӣ мегардад.

Зимни ҳамоиш нақши ҷавонон дар таҳкими Истиқлоли давлатӣ назаррас арзёбӣ гардида, изҳори итминон карда шуд, ки ҷавонони саодатёри шаҳри Гулистон бо саъю кӯшишҳои ҳадафманд идомадиҳандаи сиёсати пешгирифтаи Ҳукумати кишвар гардида, дар рушди соҳаҳои гуногуни хоҷагии халқи кишвар саҳми арзандаи худро мегузоранд.

Сипас, ҷавонон барои баргузории ҳамоиши сатҳи баланд ба масъулин ва фароҳам овардани шароити мусоид ва ғамхории пайваста ба соҳаи ҷавонон ба Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон изҳори сипос намуданд.

“ҶТ”