Имрӯз дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо ташаббуси Ташкилоти ҷамъиятии “Пайравони Пешвои миллат” ҳамоиши ҷашнӣ таҳти унвони “Пешвои миллат - роҳнамои ҷавонон ба сӯи фардои дурахшон” баргузор гардид.

Ҳамоиш бахшида ба Рӯзи ҷавонони Тоҷикистон ва Рӯзи ҷаҳонии футбол доир шуда, дар кори он муовини якуми раиси Кумита Раҳимзода Шабнам Карим, аъзоёни ташкилот, ҷавонони фаъол ва намояндагони соҳаҳои гуногун иштирок намуданд.

Зимни чорабинӣ оид ба сиёсати давлатии ҷавонон, нақши ҷавонон дар рушди ҷомеа, тарғиби тарзи ҳаёти солим ва саҳми варзиш, бахусус футбол, дар таҳкими дӯстиву ҳамдигарфаҳмӣ миёни ҷавонон маърӯзаҳо ироа гардиданд.

Ҳамчунин, дар доираи ҳамоиш намоиши дастовардҳои аъзои Ташкилоти ҷамъиятии “Пайравони Пешвои миллат” ташкил карда шуда, иштирокчиён бо корҳои эҷодӣ, иқдомҳои ҷамъиятӣ ва муваффақиятҳои ҷавонон аз наздик шинос гардиданд.

Дар фарҷоми чорабинӣ таъкид карда шуд, ки ҷавонон ҳамчун неруи пешбарандаи ҷомеа дар татбиқи сиёсати созандаи давлату Ҳукумат нақши муассир дошта, барои ҳифзи арзишҳои миллӣ ва рушди Тоҷикистони соҳибистиқлол саҳми арзанда доранд.

“ҶТ”