21 май ба муносибати Рӯзи ҷавонони Тоҷикистон ва Рӯзи ҷаҳонии футбол дар Академияи идоракунии давлатии назди Президенти Ҷумҳурии Тоҷикистон чорабинии идона таҳти унвони “Ҳомиёни тамаддун” баргузор гардид.

Тибқи иттилоъ, дар чорабинии мазкур ректори Академияи идоракунии давлатии назди Президенти Ҷумҳурии Тоҷикистон Сафарзода Даврон Ҷурахон, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шокирзода Муҳаммадтолиб иштирок ва суханронӣ намуданд.

Зимни суханронӣ таъкид гардид, ки сиёсати ҷавонпарваронаи давлату Ҳукумат, бахусус таваҷҷуҳу дастгириҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои фароҳам овардани шароити мусоид ҷиҳати таҳсил, рушди қобилият, иштироки фаъолона дар ҳаёти ҷамъиятӣ ва саҳмгузории ҷавонон дар пешрафти кишвар заминаи устувор гузоштааст. Ҳамзамон, нақши ҷавонон ҳамчун неруи созанда ва пешбарандаи ҷомеа дар рушди низоми идоракунии давлатӣ ва дигар соҳаҳои муҳими мамлакат муҳим арзёбӣ гардид.

Дар фазои тантанавӣ як қатор ҷавонони фаъоли Академия барои саҳми арзанда дар татбиқи сиёсати давлатии ҷавонон ва иштироки фаъолона дар ҳаёти ҷамъиятӣ бо Сипосномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон сарфароз гардонида шуданд.

Дар қисмати фарҳангии чорабинӣ аз ҷониби шуъбаи фарҳанг ва рушди истеъдодҳои ҷавони Академия, аъзои маҳфилҳои ҳунарӣ ва ғолибони озмунҳои ҷумҳуриявӣ барномаи рангини фарҳангӣ пешкаш гардид.

“ҶТ”