Имрӯз дар Прокуратураи генералии Ҷумҳурии Тоҷикистон бахшида ба Рӯзи ҷавонони Тоҷикистон мулоқоти Прокурори генералии Ҷумҳурии Тоҷикистон, генерал-полковники адлия Воҳидзода Ҳабибулло Сайдулло бо аъзоёни маҳфили “Пайравони Пешвои миллат” баргузор гардида, дар он инчунин раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор иштироку суханронӣ намуд.

Чорабинӣ бо садо додани Суруди миллӣ оғоз шуд.

Сипас, Прокурори генералии Ҷумҳурии Тоҷикистон, генерал-полковники адлия Воҳидзода Ҳабибулло Сайдулло баромад намуда, ҷавононро ба муносибати Рӯзи ҷавонони Тоҷикистон самимона табрику шодбош гуфт.

Таъкид гардид, ки ҷавонон неруи бузурги пешбарандаи ҷомеа, идомадиҳандагони роҳи насли калонсол ва ояндасозони давлату миллат мебошанд. Имрӯз бо дастгириву ғамхориҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ҷавонон тамоми шароиту имкониятҳои мусоид фароҳам оварда шудаанд, то онҳо дониш омӯзанд, касбу ҳунар аз худ намоянд ва дар баробари ин ҳисси ватандӯстиву худшиносии худро тақвият бахшида, дар пешрафти Тоҷикистони соҳибистиқлол саҳми арзанда гузоранд.

Дар идома гуфта шуд, ки ки ҷавонони тоҷик бо зиракии сиёсӣ, эҳсоси баланди масъулиятшиносӣ ва эҳтиром ба қонун дар таҳкими давлатдории миллӣ, ҳифзи манфиатҳои ҷомеа ва таъмини волоияти қонун саҳми шоиста гузошта истодаанд.

Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни баромади хеш ҷавонон ва донишҷӯёнро ба муносибати Рӯзи ҷавонони Тоҷикистон табрику муборакбод гуфта, ба роҳбарияти Прокуратураи генералии Ҷумҳурии Тоҷикистон барои фароҳам овардани шароит ҷиҳати мулоқот бо ҷавонон дар ростои Рӯзи ҷавонони Тоҷикистон изҳори миннатдорӣ кард.

Зикр гардид, ки Кумитаи кор бо ҷавонон ва варзиш минбаъд низ тамоми талоши худро барои дастгирии ҷавонон, баланд бардоштани маърифату ҷаҳонбинӣ, рушди тарзи ҳаёти солим ва ҷалби ҷавонон ба корҳои созанда равона хоҳад кард.

Дар охир миёни иштирокчиён ва роҳбарияти Прокуратураи генералии Ҷумҳурии Тоҷикистон суолу ҷавоб сурат гирифт.

М. МУҚАДДАМОВА, “ҶТ”