Имрӯз, 21 май дар Донишгоҳи давлатии тиббии Тоҷикистон ба номи Абуалӣ ибни Сино ҳамоиши табибони ҷавон таҳти унвони “Саломатии ҷомеа – масъулияти мо, табибони ҷавон” доир шуд.

Ҳамоиши мазкур бахшида ба Рӯзи ҷавонони Тоҷикистон баргузор гардида, дар он муовини раиси шаҳри Душанбе Дилбар Одилзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода ва намояндагони соҳаҳои мухталиф иштирок ва суханронӣ намуданд.

Дилбар Одилзода, муовини раиси шаҳри Душанбе, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Маликшо Неъматзода муовини якуми Раиси Ҳизби Халқии Демократии Тоҷикистон зимни баромади хеш иштирокчиёнро бахшида ба Рӯзи ҷавонон табрик намуда, доир ба сиёсати давлатии ҷавонон дар замони соҳибистиқлолӣ суханронӣ карданд.

Иброз гардид, ки таҷлили Рӯзи ҷавонони Тоҷикистон нишонаи таваҷҷуҳу ғамхории давлату Ҳукумати кишвар нисбати насли наврасу ҷавон мебошад. Ҷавонони имрӯзаро зарур аст, ки соҳибкасбу соҳибдониш бошанду бо кору пайкори созанда дар рушди кишвар саҳми арзандаи худро гузоранд.

Ҳамзамон, дар ҷараёни ҳамоиш масъалаҳои ҳифзи саломатии ҷомеа, нақши ҷавонон дар рушди соҳаи тиб, баланд бардоштани маърифати тиббии аҳолӣ ва масъулияти табибони ҷавон мавриди муҳокима қарор гирифт ва афзуда шуд, ки ҷавонони соҳаи тиб дар пешрафти низоми тандурустии кишвар ва таъмини солимии ҷомеа саҳми назарраси хешро гузошта истодаанд.

“ҶТ”