Ҳукумати кишвар ба ҷавонон боварии комил дошта, онҳоро ҳамчун қувваи пешбарандаи ҷомеа ва такягоҳи асосии давлат мешуморад. Ҳамчунин, Пешвои миллат муҳтарам Эмомалӣ Раҳмон дар Паёми худ ба Маҷлиси Олии Ҷумҳурии Тоҷикистон аз 22 декабри соли 2016 таъкид намуда буданд: “Аксарияти аҳолии Тоҷикистонро ҷавонон ташкил медиҳанд, ки онҳо давомдиҳандагони кору фаъолияти насли калонсол, неруи созанда ва иқтидори воқеии пешрафти ҷомеа, хулоса, ояндаи миллат ва давлат мебошанд”.

Маҳз бо дарназардошти боварӣ ба ҷавонон ва мавқеи фаъоли онҳо дар рушду нумӯи Ватани маҳбубамон, Пешвои миллат муҳтарам Эмомалӣ Раҳмон соли 2017-ро дар Тоҷикистон “Соли ҷавонон” эълон намуда буданд.

Ҷавонон ҳамчун қишри ояндасози миллат аз ғамхориҳои падаронаи Пешвои маҳбубамон руҳу илҳоми тоза гирифта, хизмат ба Ватан ва ҳифзи ҳар як порча хоки онро қарзи фарзандии худ медонанд. Ҷавонони даврони соҳибистиқлолӣ тавассути донишу малака, қобилияту тавоноии худ Тоҷикистони азизро муаррифӣ намуда, Парчами давлатии кишварро дар сатҳи ҷаҳонӣ парафшон месозанд.

Заҳмату талошҳои пайвастаи ҷавонони кишвар ва иштироки фаъоли онҳо дар самтҳои муҳими давлатдорӣ моро ба он бовар мерасонад, ки ҷавонони мо минбаъд низ тамоми кӯшишу талоши худро барои ҳифзи арзишҳои миллӣ, таҳкими давлатдорӣ, сулҳу субот ва рушди соҳаҳои иқтисодиву иҷтимоии Ватани азизамон равона хоҳанд кард.

Пешвои миллат ба ҷавонон гуфтаанд: “Ҷавонон бояд сабақҳои истиқлолиятро ҳаматарафа омӯзанд, аз сиёсати имрӯз огоҳ бошанд, таърихи гузаштаву ҳозираи халқи худро гаштаву баргашта мутолиа намоянд ва аз Ватан, миллат, забон ва фарҳанги худ ифтихор кунанд”.

Аз ин рӯ, ҷавононро мебояд шарафу номуси ватандорӣ ва амнияти давлатро ҳимоя намуда, ҳамеша номбардор ва ҳимоятгари Ватани маҳбуб бошанд.

Амирхонзода Меҳровар Амирхон
корманди Кумитаи кор бо ҷавонон ва варзиши назди Ҳукумати Ҷумҳурии Тоҷикистон