14 май дар толори Донишгоҳи байналмилалии сайёҳӣ ва соҳибкории Тоҷикистон бахшида ба Рӯзи ҷавонони Тоҷикистон ҳамоиши гирандагони стипендияҳои Президентӣ, раиси шаҳри Душанбе ва ноҳияҳои пойтахт таҳти унвони “Пайравони Пешвои миллатем” баргузор гардид.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Тибқи иттилоъ, ҳамоиш бо садо додани Суруди миллии Ҷумҳурии Тоҷикистон оғоз ёфта, дар қисми расмии он раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад, муовини раиси шаҳри Душанбе Одилзода Дилбар Раҳим ва роҳбарияти Донишгоҳи байналмилалии сайёҳӣ ва соҳибкории Тоҷикистон суханронӣ намуданд.

Зимни суханрониҳо оид ба нақши калидии ҷавонон дар рушди ҷомеа, таваҷҷуҳи Пешвои миллат ба масъалаи ҷавонон ва аҳамияти барномаҳои давлатӣ дар ҳавасмандсозии насли наврас суханрониҳо сурат гирифт.

Ҳамчунин, гирандагони стипендияҳо доир ба дастовардҳои хеш дар самти таҳсил, фаъолияти илмӣ, иҷтимоӣ ва эҷодӣ ибрози назар карда, изҳори сипоси худро ба роҳбарияти олии кишвар баён намуда, бо иродаи қавӣ изҳор доштанд, ки пайравони содиқи Пешвои миллат ҳастанд ва дар рушду пешрафти Тоҷикистони соҳибистиқлол саҳм мегузоранд.

Ҳамоиш бо барномаи фарҳангӣ ҷамъбаст гардид.

“ҶТ”