Дар деҳаи Сежди ҷамоати деҳоти Сежди ноҳияи Роштқалъа майдончаи варзишӣ мавриди истифода қарор дода шуд.

Иншооти мазкур бо дастгирии мақомоти иҷроияи ҳокимияти давлатӣ, Вазорати энергетика ва захираҳои оби Ҷумҳурии Тоҷикистон ва ҳиссаи ҷавонони деҳа ба маблағи зиёда аз 80 ҳазор сомонӣ сохта шудааст.

Майдончаи варзишӣ дар масоҳати 26Х35 ба тарҳи муосир бунёд гардида, ҷавонон деҳа минбаъд имконият доранд, чорабиниҳои варзиширо доир намоянд.

Иттилоъ дода шуд, деҳаи Сежд дорои 140 хоҷагӣ буда, ҷавонон бештар ба волейбол шавқ доранд ва дар мусобиқаҳои варзишӣ фаъолона иштирок менамоянд.

Зимни ифтитоҳи он раиси ВМКБ Мирзонабот Алишер Худоберди сокинони ҷамоатро бо 34 - солагии Истиқлоли давлатӣ ва ифтитоҳи майдончаи варзишӣ табрик гуфт.

Қайд шуд, ки маҳз бо шарофати Истиқлоли давлатӣ, таваҷҷуҳи доимии Роҳбарияти Олии мамлакат дар деҳоти дурдаст толору майдончаҳои варзишӣ сохта шуда истодаанд, ки барои ҷалби ҳарчи бештари ҷавонон ба варзиш ва интихоби тарзи ҳаёти солим мусоидат менамояд.

Сокинони деҳаи номбурда аз дастгириҳои ҳамешагии Роҳбарияти Олии мамлакат сипосгузорӣ намуда, иброз доштанд, ки дар рушду нумуи диёр ҳамеша саҳми арзандаи худро мегузоранд.

Садоншо ҶАНОБИЛШОЕВ, "ҶТ"