Имрӯз, 15-уми май, мунтахаби наврасони то 17-солаи Тоҷикистон таҳти роҳбарии Далер Каёсов дар марҳилаи чаҳорякниҳоии Ҷоми Осиё-2026, ки дар Арабистони Саудӣ ҷараён дорад, ба майдон мебарояд. Ҳарифи наврасони тоҷик яке аз дастаҳои пурқуввати қора мунтахаби Ҷопон хоҳад буд.

Ин вохӯрии муҳим соати 21:00 ба вақти Душанбе оғоз гардида, тариқи шабакаи давлатии “Варзиш” ба таври мустақим пахш мешавад. Бозӣ аҳамияти бузурги таърихӣ дорад, зеро ғолиби ин рақобат роҳхати даври нимниҳоии Ҷоми Осиё-2026-ро соҳиб мегардад.
Мунтахаби наврасони Тоҷикистон дар марҳилаи гурӯҳӣ ҳунарнамоии ҷолибу хотирмон нишон дода, бо бозии ҷаззоб ба даври плей-офф роҳ ёфт. Шогирдони Далер Каёсов дар даври аввал тими Тайландро бо ҳисоби 2:0 шикаст дода, баъдан бар мунтахаби Миянмар бо ҳисоби 1:0 пирӯз шуданд. Дар бозии охири марҳилаи гурӯҳӣ бошад, наврасони тоҷик дар рақобати пургол бо мизбони мусобиқа тими Арабистони Саудӣ мусовӣ (5:5) намуданд.
Бо ҳамин тартиб бо касби 7 имтиёз мунтахаби Тоҷикистон аз гурӯҳи “А” мақоми дуюмро ишғол намуда, ба қатори ҳашт дастаи беҳтарини қора шомил гардид.
Муваффақияти дигари муҳими тими наврасони кишвар роҳ ёфтан ба Ҷоми ҷаҳон миёни наврасон мебошад. Тоҷикистон бори чаҳорум дар таърихи худ дар Чемпионати ҷаҳон иштирок хоҳад кард. Қаблан наврасони тоҷик дар мусобиқаҳои солҳои 2007, 2019 ва 2025 ҳузур доштанд.
Ҳоло бошад, пешорӯи мунтахаби мо рақиби бисёр ҷиддӣ қарор дорад. Тими Ҷопон яке аз муддаиёни асосии унвони қаҳрамонӣ ба ҳисоб рафта, ҳамеша дар мусобиқаҳои наврасони Осиё аз қавитарин дастаҳо маҳсуб мешавад.
Бо вуҷуди ин, бозии ҷасурона ва натиҷаҳои хуби наврасони тоҷик дар марҳилаи гурӯҳӣ умеди мухлисони футболро бештар кардааст. Ҳаводорони футболи кишвар интизоранд, ки мунтахаби Тоҷикистон имрӯз низ бо руҳияи баланд ва иродаи қавӣ вориди майдон шуда, барои таърихи навбатии футболи тоҷик мубориза мебарад.

Яҳё МАҲМАДНАБИЕВ, “ҶТ”