Марҳилаи плей-оффи Ҷоми ҷаҳонии футбол-2026 рӯз аз рӯз ба нуқтаи ҳалкунанда наздик мешавад. Агар даври гурӯҳӣ бо рақобатҳои баробар ва натиҷаҳои ғайричашмдошт хотирмон шуда бошад, марҳилаи ҳаштякниҳоӣ аз 2 то 7 июл нишон дод, ки дар ин мусобиқа дигар ягон рақиби суст вуҷуд надорад. Ҳар иштибоҳ метавонад ба поёни орзуи қаҳрамонӣ табдил ёбад ва маҳз ҳамин ҳолат сабаб гардид, ки миллионҳо мухлис дар саросари ҷаҳон ҳар як бозиро бо ҳаяҷони зиёд пайгирӣ намояд.

Рақобатҳои рӯзи 2 июл бо пирӯзии мутмаини тими миллии Испания оғоз ёфт. Испаниҳо бо ҳисоби калони 3:0 Австрияро шикаст дода, нишон доданд, ки яке аз довталабони асосии унвони қаҳрамонӣ мебошанд. Футболбозони ин даста аз дақиқаҳои аввал назорати бозиро ба даст гирифта, рақибро амалан имкони ҷавоб додан нагузоштанд.

Дар ҳамин рӯз Португалия низ бар муқобили Хорватия бо ҳисоби 2:1 пирӯз шуд. Ҳарчанд пирӯзӣ бо душворӣ ба даст омад, таҷрибаи бозингарони португалӣ нақши ҳалкунанда бозид. Швейтсария бошад, Алҷазоирро бо ҳисоби 2:0 мағлуб намуда, роҳашро ба даври баъдӣ ҳамвор кард.

Рӯзи 3 июл яке аз ҷолибтарин рӯзҳои мусобиқа ба ҳисоб мерафт. Аргентина дар бозии пуршиддат муқобили Кабо-Верде бо ҳисоби 3:2 пирӯз шуд. Дастаи африқоӣ то лаҳзаҳои охир мубориза бурд ва исбот кард, ки дигар дастаҳои ба ном хурд низ метавонанд барои бузургтарин тимҳои ҷаҳон мушкил эҷод кунанд.

Дар ҳамин рӯз Миср ва Австралия дар вақти асосӣ ва иловагӣ мусовии 1:1 анҷом дода, тақдири роҳхатро ба зарбаҳои пеналтӣ супориданд. Дар ин силсила дарвозабони мисриҳо қаҳрамони воқеии бозӣ гардида, чанд зарбаи ҳалкунандаро баргардонд ва дастаашро ба даври баъдӣ баровард. Колумбия бошад, бо як голи ягона бар Гана пирӯз шуд.

Аз 4 июл рақобатҳои даври ҳаштякниҳоӣ оғоз гардиданд. Марокаш боз як маротиба тамоми ҷаҳонро ҳайратзада кард. Ин даста Канадаро бо ҳисоби бузурги 3:0 шикаст дода, нишон дод, ки муваффақияти солҳои охир тасодуфӣ нест. Фаронса бошад, бар муқобили Парагвай бо ҳисоби минималии 1:0 ғалаба намуда, роҳхати чорякфиналро соҳиб шуд.

Яке аз сенсатсияҳои асосии мусобиқа рӯзи 5 июл рух дод. Норвегия бар яке аз фаворитҳои асосии мусобиқа - Бразилия бо ҳисоби 2:1 ғалаба кард. Миллионҳо мухлис интизор доштанд, ки бразилиҳо ба осонӣ аз ин марҳила мегузаранд, аммо футболбозони Норвегия бо интизоми баланд ва истифодаи ҳар як имконият натиҷаи таърихиро ба даст оварданд.

Дар бозии дигари ҳамин рӯз Англия ва Мексика намоиши воқеии футболро пешкаш карданд. Бозӣ пур аз лаҳзаҳои хатарнок буд ва англисҳо танҳо дар дақиқаҳои охир тавонистанд бо ҳисоби 3:2 ғалаба намоянд.

Шояд муҳимтарин бозии даври ҳаштякниҳоӣ рӯзи 6 июл баргузор гардид. Ду ҳамсоякишвар - Испания ва Португалия барои роҳхат ба чорякфинал вориди майдон шуданд. Ин бозӣ аз ҷониби бисёриҳо ҳамчун охирин имконияти Криштиану Роналду барои ба даст овардани Ҷоми ҷаҳон арзёбӣ мешуд. Аммо испаниҳо бо бозии муназзам ва як голи ҳалкунанда бо ҳисоби 1:0 пирӯз шуданд. Бо ин бохт саҳифаи дигаре аз фаъолияти Роналду дар Ҷоми ҷаҳон ба анҷом расид.

Дар ҳамин рӯз Белгия низ бо ҳисоби бузурги 4:1 Иёлоти Муттаҳидаи Амрикоро мағлуб намуда, яке аз пуриқтидортарин бозиҳои худро дар мусобиқа нишон дод.

Рӯзи 7 июл навбат ба Лионел Месси расид. Аргентина дар бозии бисёр душвор бар Миср бо ҳисоби 3:2 пирӯз шуда, роҳхати чорякфиналро соҳиб гардид. Месси боз як маротиба нишон дод, ки ҳатто дар 39-солагӣ ҳам метавонад сарнавишти бозиро тағйир диҳад ва дастаашро ба пеш барад.

Дар бозии дигари рӯз Швейтсария ва Колумбия дар вақти асосӣ ва иловагӣ гол зада натавонистанд. Танҳо дар силсилаи пеналтиҳо швейтсариҳо дақиқтар амал намуда, бо ҳисоби 4:3 пирӯз шуданд.

Ҳамин тариқ, пас аз анҷоми даври ҳаштякниҳоӣ ҳашт даста барои идомаи мубориза боқӣ монд. Фаронса, Марокаш, Испания, Белгия, Норвегия, Англия, Аргентина ва Швейтсария акнун барои роҳхат ба нимфинал талош хоҳанд кард.

Даври чорякфиналӣ бо рақобатҳои бисёр ҷолиб оғоз мешавад. Фаронса бо Марокаш, Испания бо Белгия, Норвегия бо Англия ва Аргентина бо Швейтсария рӯ ба рӯ мешаванд. Ҳар яке аз ин рақобатҳо метавонад сазовори финали пеш аз муҳлат бошад.

Яҳё МАҲМАДНАБИЕВ, “ҶТ”