Муҳаммадамин Абдуллоев 25 декабри соли 2005 дар шаҳри Кӯлоб таваллуд шудааст. Ӯро дар байни ҷавонону наврасон ҳамчун паҳлавон аз намуди гӯштини тарзи озод мешиносанд. Муҳаммадамин дар мактаби ҷумҳуриявии тайёриҳои дастаҳои мунтахаб машқу тамрин дорад.

Шурӯъ аз 9 - солагӣ то инҷониб дар мусобиқаҳои дохиливу хориҷӣ иштирок намуда, сазовори ҷойҳои намоён гаштааст. Муҳаммадамин дорандаи медали биринҷии Чемпионати Осиё байни хурдсолон соли 2019 дар давлати Чин, дар вазни 57 кило мебошад. Соли 2022 дар Чемпионати Осиё дар Қирғизистон сазовори медали нуқра гардидааст. 6 карат қаҳрамони Тоҷикистон миёни наврасон мебошад.

МЕРОСБАРИ ПАДАР

Падари хонадон Ҷамшед Абдуллоев паҳлавон буд ва аз замони хурдсолӣ ҷигарбанди хешро ба толори варзишӣ бурда, таълими гӯштин медод. Солҳо мегузаштанду аз Муҳаммадамини хурду нотавон як ҷавони паҳлавонбозу месохтанд. Ӯ дар толори варзишӣ паҳлу ба паҳлуи падар тамрини гӯштин мекард ва оҳиста - оҳиста ин макон барои қаҳрамони мо маҳбубтарин ҷой гардидаву тамоми муваффақияташ аз ҳамин ҷо шуруъ гардидааст.

- Вақте хурдсол будам, ҳамроҳи падар ба толори варзишӣ мерафтаму паҳлуяш ба машқ мепардохтам. Маҳз меҳри варзишро, шӯру шавқи варзишгар шуданро падари паҳлавонам дар дилам бедор кардааст. Падарам бисёр мехост ман варзишгар шаваму парчамбардори меҳан. Барои ин маро лозим буд, орзуи падарамро дар майдонҳои бузурги гӯштин амалӣ намоям. Барои омода шудан ба мусобиқаи Осиё шабу рӯз бо падараму мураббиям тамрин менамудем, - мегӯяд ӯ.

Падар намехост ҷигарбандаш дар майдони рақобат сархам монад. Натиҷаи ҷаҳду талоши падар бенатиҷа намонд. Ҳамин тавр, Муҳаммадамин дар мусобиқаи Осиё оид ба гӯштини тарзи озод миёни наврасони то 17-сола , ки дар Ҷумҳурии Қирғизистон баргузор гардид, дар вазни то 80 кило ба гирифтани нишони нуқра сарфароз шуд.

- Вақте ки падар муваффақият, бурдбориҳои писарашро мебинад, бешубҳа худро хушбахттарин нафар меҳисобад. Он рӯзе, ки ҷигарбанди ман дар майдони рақобат буд, ҳар зарбае, ки мехӯрд, онро дар худ эҳсос мекардам. Ҳар дарде, ки писарам мекашид, онро дар худ ҳис мекардам. Пас аз қувваозмоӣ ва бурди писарам дар ин мусобиқа як эҳсоси хубу фараҳбахш фароям гирифт, - гуфт Ҷамшед Абдуллоев, падари Муҳаммадин.

Муҳаммадамин Абдуллоев зери дастгириву сарпарастии клуби варзишии “Шоҳона” ва роҳбари он Наврӯз Усмонов ба чандин мусобиқаҳои берун аз кишвар сафарбар шудааст. Ӯ аз тарафи ин клуб барои машқу тамрин ва таҷриба гирифтан ба давлатҳои Қазоқистон, Қирғизистон, Русия, Туркия, Гурҷистон ва Эрон рафтааст, то аз тарзу усулҳои гӯштин дар хориҷи кишвар бохабар бошад.

- Ҳамин дастгириҳои падарам ва бахусус дастгириҳои сарпарастам Наврӯз Усмонов буд, ки имрӯз рӯйи гилеми гӯштин қаҳрамонӣ мекунам.
Ӯ мехоҳад боз ҳам ба қуллаҳои баланди варзиш бирасад. Ҳоло мақсаду мароми Муҳаммадамин танҳо як чиз аст. Он ҳам бошад, иштирок ва ба даст овардани медали тилло дар Чемпионати ҷаҳон. Барояш барор мехоҳем.