Бахшида ба ҷашни 35-солагии Истиқлоли давлатии Ҷумҳурии Тоҷикистон, 9 май дар Ҷамоати деҳоти Кангурти ноҳияи Темурмалики вилояти Хатлон яке аз бузургтарин мусобиқаҳои ҷумҳуриявии гӯштини миллӣ дар фазои тантанавӣ ва бо иштироки густурдаи ҳаводорони варзиш баргузор гардид.

Ин чорабинии бошукӯҳи варзишӣ бо ташаббуси соҳибкорони ватандӯсти тоҷик роҳандозӣ шуда, беш аз 40 ҳазор мухлис ва дӯстдорони гӯштини миллиро аз минтақаҳои гуногуни кишвар ба ҳам овард. Мусобиқа дар сатҳи баланди ташкилӣ баргузор гардида, ба як иди воқеии варзиш ва ҳамдилӣ табдил ёфт.

Дар мусобиқа паҳлавонони номдори Тоҷикистон, Узбекистон, Қазоқистон ва Федератсияи Русия иштирок намуда, дар рақобатҳои пуршиддат маҳорати баланди варзишӣ ва ҳунари гӯштингирии худро ба намоиш гузоштанд. Ҳар як рақобат бо шавқу ҳаяҷони зиёд аз ҷониби мухлисон истиқбол гирифта шуда, фазои майдонро руҳияи рақобати солим фаро гирифта буд.
Тибқи иттилои масъулини чорабинӣ, барои ғолибон ва ҷоизадорон мукофотҳои арзишманд, аз ҷумла беш аз 500 ҳазор сомонӣ маблағи пулӣ, 15 уштур ва 9 автомашинаи гаронарзиш ҳамчун шоҳҷоиза пешбинӣ гардида буд. Паҳлавононе, ки бар ҳарифони худ дастболо шуданд, соҳиби ин туҳфаҳои қиматбаҳо гардиданд.

Шоҳҷоизаҳои асосии мусобиқа насиби паҳлавонони шинохтаи тоҷик Ёсин Бобокалонов, Ҳайдари Саидкабирзода, Наврӯзи Каримзод ва Шарифҷон Назриев гардид. Ҳамчунин, паҳлавони Ҷумҳурии Узбекистон Зоҳид Ҳусайнов низ бо ҳунарнамоии шоиста соҳиби яке аз ҷоизаҳои асосӣ шуд.

Дар доираи ҳамин ҳамоиши варзишӣ ғолибону ҷоизадорони мусобиқаи байналмилалии ҷудо -“Dushanbe Grand Slam-2026” низ қадрдонӣ гардиданд. Аз ҷумла, Эмомалӣ Нуралӣ ва Муҳиддин Асадуллоев, ки дар ин мусобиқа медалҳои тилло ба даст оварда буданд, бо маблағи 50 ҳазор сомонӣ қадрдонӣ шуданд. Инчунин, ба Лоиқ Қутбиддинов, ки соҳиби медали биринҷӣ гардида буд, автомашинаи барқӣ тақдим карда шуд.

Ташкилкунандагон ҳамчунин собиқадорони варзиши тоҷикро низ дар канор нагузошта, ба ҳар яки онҳо 5 ҳазор сомонӣ, ҷома ва тоқӣ эҳдо намуданд. Ин иқдом аз ҷониби иштирокдорон ва мухлисон ҳамчун арҷгузорӣ ба хизматҳои варзишгарони собиқ баҳои баланд гирифт.

Яке аз чеҳраҳои ҷолиби мусобиқа паҳлавони наврас Тоҳирҷони Амриддин дастпарвари Клуби варзишии “Парвиз Собиров” буд. Ӯ бо ҳунарнамоии диданӣ бар чаҳор рақиби худ пирӯз шуда, сазовори 30 ҳазор сомонӣ гардид. Баромади ин паҳлавони ҷавон таваҷҷуҳи махсуси мухлисонро ба худ ҷалб намуд ва ҳамчун истеъдоди ояндадори гӯштини миллӣ арзёбӣ гардид.

Мусобиқаи гӯштини миллии Кангурт бори дигар нишон дод, ки варзиши миллӣ дар Тоҷикистон маҳбубияти зиёд дошта, метавонад ҳазорон нафарро атрофи арзишҳои ватандӯстӣ, ҷавонмардӣ ва дӯстиву ҳамдигарфаҳмӣ муттаҳид созад.

Я. МАҲМАДНАБИЕВ, “ҶТ”