Имрӯз дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон маросими гусели ҳайати варзишгарони ҷумҳурӣ вобаста ба иштирок дар Бозиҳои XX Осиёӣ баргузор гардид.

Дар маросим муовини Сарвазири Ҷумҳурии Тоҷикистон Дилрабо Мансурӣ, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода, роҳбарону масъулони соҳаи варзиш, намояндагони федератсияҳои варзишӣ, мураббиён ва ҳайати варзишии мамлакат иштирок намуданд.

Зимни вохӯрӣ масъалаҳои вобаста ба омодагии варзишгарони тоҷик ба яке аз муҳимтарин чорабиниҳои варзишии қораи Осиё, ҳадафҳои ҳайати мунтахаби кишвар ва масъулияти варзишгарон дар муаррифии Тоҷикистон дар арсаи байналмилалӣ мавриди таваҷҷуҳ қарор гирифтанд.

Бояд гуфт, ки Бозиҳои XX Осиёӣ аз 19 сентябр то 4 октябри соли 2026 дар шаҳрҳои Айчи ва Нагояи Ҷопон баргузор мешаванд. Дар ин мусобиқаи қоравӣ варзишгарони кишварҳои Осиё барои ба даст овардани медалҳо аз рӯи намудҳои гуногуни варзиш рақобат мекунанд.

Гуфтан зарур аст, ки Тоҷикистонро дар Бозиҳои имсола 117 варзишгар намояндагӣ мекунанд. Ба барномаи омодагии варзишгарони тоҷик намудҳои гуногуни варзиш, аз ҷумла, ҷудо, бокс, гӯштини тарзи озод, таэквондо, варзиши сабук, шиноварӣ, вазнбардорӣ ва дигар намудҳо дохил шудаанд.

Яҳё МАҲМАДНАБИЕВ, “ҶТ”