21-уми октябр дар шаҳри Абу-Дабии Аморати Муттаҳидаи Араб мусобиқаи “Abu Dhabi Grand Slam 2022” шуруъ шуд. Тоҷикистонро дар рӯзи аввали мусобиқа Шоҳида Қаландарова (-57 кг) миёни бонувон ва Муслимбек Каримов (-60 кг) бо Шаҳбози Саидабуроров (-66 кг) намояндагӣ карданд.

Дар вазни зери 57 кг миёни бонувон Шоҳида Қаландарова мубориза бурд.

Шоҳида дар даври аввал бо намояндаи Италия - Вероника Тониолои 19 сола сабқат кард. Тақдири ин рақобат то ба вақти тиллоӣ рафта камфаъолии Шоҳида сабаб шуд, то довар ба ӯ 3 шидо диҳад. Ин огоҳиҳо боис гардиданд, то Шоҳида аз идомаи мусобиқа бенасиб монад.

Миёни мардон бошад Муслимбек Каримов (- 60 кг) дар даври аввал озод буд ва дар даври дуюм бо Аҳмад Ал Нақбӣ аз АМА сабқат кард.

Ҳанӯз дар дақиқаҳои аввал Муслимбек нисбат ба ҳариф фаъол буд ва тавонист, ки як вазарӣ ҳам кор кунад.

Дар идома Муслимбек ҳарифаш Ал Нақбиро дар ҳолати "осаикоми" нигоҳ дошта, пирӯзӣ ба даст овард.

Муслимбек дар даври 3-юм бо ҷудокори гурҷӣ Темур Нозадзе қувваозмоӣ кард. Дар ин сабқат пирӯзӣ насиби Темур Нозадзе гардид. Барои Муслимбек мусобиқа анҷом ёфт.

Ҷудокори дигар аз Тоҷикистон Шаҳбоз Саидабуроров (-66 кг) пас аз пирӯзӣ муқобили Моунис Ҳавсави аз Арабистони Саудӣ дар марҳилаи ҳаштякниҳоӣ аз ҷудокори испанӣ Алберто Мартин Гайтеро бо се шидо мағлуб шуд ва аз идомаи мусобиқа бенасиб монд.

Ҳамин тавр, рӯзи якуми “Abu Dhabi Grand Slam 2022” барои ҷудокорони тоҷик бенатиҷа хотима ёфт.

Пагоҳ, зери вазни то 63 кг миёни бонувон – Мавлуда Одинаева ва миёни мардони зери вазни то 73 кг ва 81 кг – Маҳмадшариф Наҷмиддинов бо Шодмон Ризоев Тоҷикистонро дар “Abu Dhabi Grand Slam 2022” намояндагӣ хоҳанд кард.