Дар шаҳри Хуҷанд дар доираи чорабиниҳои варзишӣ Фестивали футбол ва мусобиқаи байналмилалии футзал барои дарёфти Ҷоми Тавҳидбонк доир гардид, ки дар он 6 даста аз кишварҳои Тоҷикистон, Узбекистон, Қирғизистон ва Ҷумҳурии Исломии Эрон иштирок намуданд.

Дар маросими расмии чорабинӣ котиби генералии ФФТ Фурқат Аҳмадҷонов, раиси вилояти Суғд Раҷаб Аҳмадзода, футзалбози ҷаҳонӣ Александро Роза Виейра иштирок ва суханронӣ намуданд.

Таъкид гардид, ки бо ташаббуси Президенти Ассотсиатсияи футболи Осиёи Марказӣ, Президенти Федератсияи футболи Ҷумҳурии Тоҷикистон, раиси шаҳри Душанбе муҳтарам Рустами Эмомалӣ ва ҷонибдории СММ 25 май Рӯзи ҷаҳонии футбол эълон гардид. Дар Тоҷикистони соҳибистиқлол бо ташаббуси ФФТ бо мақсади дар сатҳи баланд таҷлил намудани Рӯзи ҷаҳонии футбол чорабиниҳои зиёд роҳандозӣ гардиданд.

Гуфта шуд, ки натиҷаи чунин таваҷҷуҳ ва ғамхориҳо буд, ки дар мамлакат футбол рушд намуда, бо роҳандозӣ гардидани чунин мусобиқаҳои варзишӣ маҳорату малакаи варзишгарон баланд бардошта мешавад. Ҳамзамон, илова карда шуд, ки ин гуна чорабиниҳо дӯстӣ миёни кишварҳои иштироккунандаро боз ҳам мустаҳкам мегардонад.

Дар фазои тантанавӣ ба дастаи “Сипар”-и шаҳри Хуҷанд, ки соли равон дар суперлигаи Тоҷикистон оид ба футзал дар байни 8 дастаи беҳтарини кишвар мақоми сеюмро соҳиб гардида буд, медалҳои биринҷӣ ва мукофотпулӣ тақдим гардид.

Ёдовар мешавем, ки мусобиқаи байналмилалии футзал аз 26 май оғоз гардида, то 29 идома ёфт. Футзалбозони кишварҳои Тоҷикистон, Узбекистон, Қирғизистон, Ҷумҳурии исломии Эрон маҳорати хуб нишон дода, хотири мухлисонро шод намуданд.

Субҳиддин ҚОДИРОВ, “ҶТ”