19 октиябр дар шаҳри Сеули Кореяи Ҷанубӣ ҷаласаи 26-ум Ассамблеяи генералии Ассотсиатсияи кумитаҳои миллии олимпӣ (ANOC) оғоз шуд.

Дар ҷаласаи мазкур намояндагон аз 204 кумитаҳои миллии олимпӣ иштирок намудаистодаанд. Ҷаласа то 21-уми октябр идома меёбад. Дар ин ҷаласа аз Тоҷикистон Абдулло Раҳмонзода ноиби Президенти Кумитаи миллии олимпии Тоҷикистон, ва Абдуллозода Муҳаммадшо, котиби генералӣ КМО иштирок доранд.

Давоми ду рӯз иштирокчиён гузоришҳои котиби генералии АКМО, Комиссияи ҳуқуқи АКМО, Комиссияи молия ва аудити АКМО, Комиссияи мусобиқаҳои АКМО, Бозиҳои соҳилии ҷаҳон-2023, Агентии ҷаҳонии зидди допинг (WADA), Агентии байналмилалии ташхисӣ (ITA), Суди арбитражи байналмилалӣ, гузориши ниҳоии Кумитаи тадорукоти Бозиҳои зимистонаи олимпии Пекин-2022, гузоришҳои Кумитаи тадорукоти Бозиҳои зимистонаи олимпии наврасон – Гангвон-2024, Кумитаи тадорукоти Бозиҳои зимистонаи олимпии Милан/Кортина-2026, Кумитаи тадорукоти Бозиҳои олимпии Париж-2024-ро хоҳанд шунид.

Ёдовар мешавем, ки ҷаласа ҳамчунин Нақшаи стратегии АКМО барои солҳои 2021-2024 тасдиқ шуда, президент ва ноиби аввали президенти АКМО барои давраи нав интихоб мегарданд.
Қайд кардан ба маврид аст, ки рӯзи сеюм дар сессияҳо масъалаҳои муҳими соҳаи варзиш ва ҳаракати олимпӣ баррасӣ мешаванд.