Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар шаҳри Панҷакент бо шароит ва ҳолати кунунии варзишгоҳи марказии шаҳр шинос шуда, дар саҳни он бо дастаи футболбозони наврас суҳбат дидор намуд.

Бино ба иттилои маркази таҳлил ва иттилооти Кумитаи кор бо ҷавонон ва варзиш, нахуст раиси Кумита ҳозиринро ба истиқболи Рӯзи варзишгарон шодбош гуфта, таъкид кард, ки футбол яке аз намудҳои рушдёфтаи соҳаи варзиш дар қаламрави Тоҷикистон ба ҳисоб рафта, дар миёни аҳолӣ нисбат ба дигар намудҳои варзиш маҳбубияти зиёд касб намудааст.

- Шумо футболбозони наврас, ки бо руҳияи ватандӯстӣ ва меҳри ана ҳамин сарзамини аҷдодӣ майдон мебароед, метавонед илҳомбахши наслҳои оянда бошеду шарафи Тоҷикистонро дар арсаи ҷаҳонӣ баланд бардоред, - иброз дошт раиси Кумита.

Сипас, ба наврасон ҳамчун армуғони идона дар арафаи Рӯзи варзишгарон лавозимоти варзишӣ тақдим гардид.