29 августи соли равон дар деҳаи Нисури ҷамоати деҳоти Савноби ноҳияи Рӯшон майдончаи варзишии замонавӣ ба истифода дода шуд.

Майдончаи мазкур бо дастгирии мақомоти иҷроияи ҳокимияти давлатӣ ва ташаббуси ҷавонони деҳа бо тарҳи муосир бунёд гардидааст.

Раиси ВМКБ Мирзонабот Алишер Худобердӣ иншооти варзиширо кушода, зикр кард, ки ба хотири пиёда сохтани сиёсати варзишпарваронаи Пешвои муаззами миллат муҳтарам Эмомалӣ Раҳмон имрӯзҳо на танҳо дар маркази шаҳру ноҳияҳо, балки деҳоти дурдаст толору майдончаҳои варзишӣ сохта шуда, сафи варзишгарони ҷоизадор низ рӯ ба афзоиш дорад.

Ифтитоҳи чунин майдончаи варзишӣ имкон медиҳад, ки дар ояндаи наздик аз миёни ҷавонони деҳа парчамбардорони номӣ ба воя расида, шарафу номуси варзишии кишварро ҳимоя хоҳанд кард.

Сипас, варзишгарони деҳа бо туҳфаҳои хотиравии раиси вилоят сарфароз гардонида шуданд.

Садоншо ҶАНОБИЛШОЕВ, "ҶТ"