Дар доираи баргузории бозиҳои наврӯзии Созмони ҳамкории Шанхай дар шаҳри Хуҷанд мусобиқаи байналмилалӣ оид ба камонварӣ баргузор гардид.

Дар ин бора аз Кумитаи кор бо ҷаванон ва варзиши назди Ҳукумати Ҷумҳурии Тоҷикистон хабар доданд.

Дар маросими ифтитоҳи мусобиқа раиси вилояти Суғд Раҷаб Аҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор, камонварбонуи тоҷик, барандаи медали биринҷии Бозиҳои тобистонаи олимпии Монреали Канада дар соли 1976 Зебунисо Рустамова ва дигар меҳмонони расмӣ иштирок намуданд.

Ба гуфтаи масъулин, мусобиқа бо мақсади таҳкими дӯстӣ ва ҳамкории байналмилалӣ, тарғиби тарзи ҳаёти солим ва рушди соҳаи варзиш миёни ҷавонон роҳандозӣ гардида, варзишгарон аз кишварҳои гуногун маҳорати баланди худро нишон доданд.

Дар намудҳои гуногуни камонварӣ иштирокчиён байни ҳам рақобат намуда, барои ишғоли ҷойҳои намоён талош варзиданд.

Дар анҷоми мусобиқа ғолибон ва ҷоизадорон бо медалу диплом ва туҳфаҳои хотиравӣ сарфароз гардонида шуданд.

Шаҳноза АЗИМОВА, “ҶТ”