14-16-уми октябр дар пойтахти Арманистон - шаҳри Ереван мусобиқоти қаҳрамонии самбои ҷаҳон миёни наврасону ҷавонон баргузор гардид. Дар мусобиқоти мазкур, ки 16-уми октябр ба поён расид, варзишгарони навраси 23 кишвар барои 55 маҷмӯи медалҳо аз рӯи дараҷаҳои гуногуни вазнӣ рақобат карданд.

Аз ҷумла варзишгарони тоҷик низ дар ин мусобиқот иштирок доштанд. Ба ҳайати тими миллии мо 17 варзишгар шомил шуда буданд. Паҳлавонони тоҷик ба гирифтани ҳафт медал (1 тило, 2 нуқра ва 4 биринҷӣ) даст ёфтанд.

Ёдовар мешавем, ки дар рӯзи аввали мусобиқот дар намуди самбои варзишӣ миёни наврасони 14-16-сола (кадетҳо) ду варзишгари тоҷик - Муҳаммадамин Лоиқов дар вазни то 64 кило ва Аминҷони Абдулфайёз дар вазни то 71 кило нишонҳои биринҷиро гирифтанд.

Абдуллои Ориф дар мусобиқаи наврасони 16-18-сола дар вазни то 64 кило дар даври ниҳоӣ бо варзишгари Муғулистон Батдаваа Батҳуяг мубориза бурд. Дар мусобиқаи мазкур Абдулло аз рақибаш шикаст хӯрда бо медали нуқра сарфароз гашт.

Ёдовар мешавем, ки дар рақобатҳо миёни навҷавонони 18-20-сола оид ба самбои варзишӣ медали тилоро Фарзиншоҳ Ҳусейнов 16-уми октябр- дар рӯзи охирини мусобиқот моли худ кард. Фарзиншоҳ дар даври ниҳоӣ гӯштигири узбек Асрор Ҳамидовро мағлуб карда, ба унвони қаҳрамони ҷаҳон дар вазни беш аз 98 кило мушарраф шуд.

Ба иттилои сомонаи расмии Федератсияи байналмилалии самбо (FIAS), бори аввал дар таърихи мусобиқоти қаҳрамонии ҷаҳон дар Ереван рақобатҳо оид ба самбои размӣ миёни навҷавонон доир гардид.