Дар Ҷамоати деҳоти Ворухи шаҳри Исфара ба муносибати гусели наваскарон роҳпаймоӣ ва ҳамоиши идона баргузор гардида, навдаъватшудагонро бо шодиву нишот ва фараҳу ифтихор ба сафи Артиши миллӣ гусел намуданд.

Дар чорабинӣ масъулини Мақомоти иҷрояи ҳокимияти давлатии шаҳри Исфара, волидони даъватшавандагон, сарбозону собиқадорони меҳнат иштирок намуда, зимни суханронӣ иброз доштанд, ки Қувваҳои Мусаллаҳ мактаби шуҷоату мардонагӣ, тарбия ва камолоти маънавии ҷавонон аст. Имрӯз дар сафи Артиши миллӣ ҷавонони ватандӯст дар баробари ҳимояи марзу буми кишвар руҳану ҷисман обу тоб ёфта, сабақи зиндагӣ меомӯзанд.

Бо ифтихор таъкид гардид, ки ҷавонони ватандӯсти деҳоти Ворух давоми чанд сол мешавад, ки иқдоми наҷиб ва ватанхоҳона пеш гирифта, дар рӯзи нахустини даъвати ҷавонон ба сафи Қувваҳои Мусаллаҳ нақшаи даъватро барзиёд иҷро менамоянд. Дар заминаи ин анъанаи нек чун солҳои қаблӣ имсол ҳам фарзандони шуҷоъ ва далеру тавонои Ворух бо амри дилу виҷдон ба хидами ҳарбӣ равона шуданд ва дар рӯзи аввал дар ин гӯшаи зебои диёр нақшаи даъвати баҳории ҷавонон ба хизмати ҳарбӣ таъмин гардид.

Барномаи рангини фарҳангӣ ба чорабинии гусели наваскарон шукуҳи тоза бахшида, хурду бузурги деҳоти Ворух родмардони ватанро бо шодиву нишот ва ифтихори зиёд ба хизмати Модар-Ватан гусел карданд.

Субҳиддин ҚОДИРОВ, “ҶТ”