Чорабинии бошукӯҳи фарҳангӣ бахшида ба 33 - солагии таъсисёбии Қувваҳои Мусаллаҳи Ҷумҳурии Тоҷикистон дар Театри мусиқию мазҳакавии ба номи М. Назарови шаҳри Хоруғ баргузор гардид.

Раиси вилоят Мирзонабот Алишер Худобердӣ ва ҳайати расмиро дар даромадгоҳ наврасон бо сурудҳои ватандӯстона пешвоз гирифта, бо лаҳни кӯдакона афсарону сарбозонро табрик намуданд.

Қисмати расмии чорабинӣ бо баровардани Парчами давлатӣ ба толор ва садо додани Суруди миллӣ оғоз гардид.

Раиси вилоят Мирзонабот Алишер Худобердӣ афсарону сарбозон ва аҳли толорро бо ин санаи фархунда шодбош гуфт.
Зикр шуд, ки дар тули 33 сол Қувваҳои Мусаллаҳи Ҷумҳурии Тоҷикистон, ки яке аз рукнҳои асосии давлатамон мебошад, масири хеле сангин, вале пурифтихорро тай ва рисолату масъулияти бардӯшдоштаро сарбаландона иҷро намуда, имрӯз ҳамчун муҳофизи қавӣ ва боэътимоди марзу буми Ватани маҳбуб, ҳомии устувори сулҳу суботи давлату миллат фаъолияти пурсамар дорад.

Вақте ки мо аз қуллаи сивусеюмин солгарди таъсисёбии Қувваҳои Мусаллаҳи Ҷумҳурии Тоҷикистон ба ибтидои ташаккули он назар меандозем, бешубҳа, бори дигар, ба саҳми бузургу нақши боризи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар бунёди давлатдории навини тоҷикон, минҷумла, таъсиси Қувваҳои Мусаллаҳи мамлакат қоил мешавем.

Маҳз садоқату ҷасорат ва фидокориву ҷоннисории генералҳову афсарон ва сарбозон дар якҷоягӣ бо дигар мақомоти ҳифзи ҳуқуқу амнияти мамлакат буд, ки дар Тоҷикистон сулҳ барқарор ва мамлакат ба маҷрои созандагӣ ворид гардид.

Дар идомаи чорабинӣ иддае аз сардорони раёсатҳо ва афсарону сарбозон бо Сипосномаи вазири мудофиаи Ҷумҳурии Тоҷикистон ва Ифтихорномаи раиси вилоят қадр карда шуданд.

Беҳтарин сурудаҳои ватандӯстонаи аҳли фарҳанги вилоят анҷомбахши чорабинӣ гардиданд.

Садоншо ҶАНОБИЛШОЕВ, “ҶТ”