Имрӯз дар Хадамоти алоқаи назди Ҳукумати Ҷумҳурии Тоҷикистон Федератсияи футболи Тоҷикистон (ФФТ) ва “Тоҷиктелеком” созишномаи шарикии стратегиро ба имзо расониданд, ки ба рушди инфрасохтори рақамӣ ва тақвияти соҳаи футбол дар кишвар равона шудааст.

Дар маросими имзои санад директори генералии ОАО “Тоҷиктелеком” Бахтовар Абдусатторзода ва муовини Президенти ФФТ Искандар Ҷалилов иштирок намуданд.

Тибқи иттилои ҷонибҳо, ҳадафи асосии ҳамкорӣ рушди технологияҳои рақамӣ дар соҳаи варзиш, аз ҷумла таъмини дастрасии интернети босуръат дар варзишгоҳҳо ва пойгоҳҳои тамринӣ мебошад. Инчунин, дар доираи созишнома татбиқи хизматрасониҳои муосири рақамӣ, беҳтар намудани идоракунии мусобиқаҳо ва фароҳам овардани шароити мусоид барои мухлисон пешбинӣ шудааст.

Зимни суханронӣ Бахтовар Абдусатторзода таъкид намуд, ки футбол яке аз намудҳои маъмултарини варзиш дар кишвар буда, ҳамгироии он бо технологияҳои муосир ба рушди соҳа такони ҷиддӣ мебахшад. Ба гуфтаи ӯ, татбиқи лоиҳаҳои муштарак барои баланд бардоштани сатҳи хизматрасонӣ ва ҷалби бештари мухлисон мусоидат хоҳад кард.

Дар навбати худ, Искандар Ҷалилов изҳор дошт, ки ҳамкорӣ бо “Тоҷиктелеком” барои рақамикунонии фаъолияти футбол ва беҳтар намудани инфрасохтори он заминаи мусоид фароҳам меорад.

М. МУҚАДДАМОВА, “ҶТ”