ҶСК "Тоҷик Эйр" фаъолияти худро дар асоси дастури супоришҳои Ҳукумати Ҷумҳурии Тоҷикистон ба роҳ монда, дар асоси таҳлили ҳамаҷонибаи вазъи пешомада ва ислоҳи камбудиҳои ҷойдошта барои аз ҳолати бӯҳронӣ раҳо додану фароҳам овардани заминаи рушди минбаъдаи ҷамъият чораҳои дахлдор андешида истодааст.

Дар ин бора 29 январ Парвиз Шодмонзода директори ҶСК "Тоҷик Эйр" зимни нишасти матбуотӣ хабар дод.

Номбурда изҳор дошт, ки дар соли 2024-2025 бо дастгирии Агентии авиатсияи граждании назди Ҳукумати Ҷумҳурии Тоҷикистон, аз ҷониби ҶСК “Тоҷик Эйр”, бо мақсади осон гардидани рафтуомади шаҳрвандон ба шаҳру ноҳияҳои дурдасти ҷумҳурӣ, дар самти кушодани хатсайрҳои маҳаллӣ як қатор корҳои назаррас ба иҷро расиданд. Аз ҷумла, 3 октябри соли 2024 дар хатсайри Душанбе-Хоруғ, 15 январи соли 2025 дар хатсайри Душанбе-Кӯлоб, 24 январи соли 2025 дар хатсайри Душанбе Панҷакент парвозҳои мунатазам оғоз гардиданд.

-ҶСК “Тоҷик Эйр” дар оянда низ нақша дорад, ки ба дигар минтақаҳои ҷумҳурӣ парвозҳоро роҳандозӣ намояд, ки ин ҷиҳати осон ва бехатар сафар намудани мусофирон мусоидат менамояд. -гуфт П. Шодмонзода.

Наҷиба МУРОДБЕКОВА, "ҶТ"