120 нафар ҷавонон аз ҳудуди ҷумҳурӣ, ки дар доираи Фестивали ҷумҳуриявии “Дӯстии ҷавонон” дар вилояти Суғд қарор доранд, имрӯз дар шаҳри Хуҷанд ва ноҳияи Бобоҷон Ғафуров аз мавзеъҳои таърихиву сайёҳӣ дидан намуданд.

Дар "Қалъаи Хуҷанд" ба иштирокчиёни Фестивал аз таърихи куҳани миллати тамаддунсози тоҷик, қаҳрамониву ҷоннисории фарзандони фарзона, замони соҳибистиқлолӣ ва саҳми Пешвои миллат муҳтарам Эмомалӣ Раҳмон дар рушди Тоҷикистони соҳибистиқлол маълумот дода шуд.

Баргузории Фестивали ҷумҳуриявии "Дӯстии ҷавонон" дар таҳкими худшиносӣ, боло рафтани ҳисси ватандӯстӣ ва мустаҳкам гардидани риштаи дӯстӣ миёни ҷавонон заминаи мусоид фароҳам меорад.

Ёдовар бояд шуд, ки бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Фестивали ҷумҳуриявии "Дӯстии ҷавонон" роҳандозӣ гардида, 120 нафар ҷавонон аз ҳудуди ҷумҳурӣ ба шаҳру ноҳияҳои вилояти Суғд ташриф оварданд.

Фестивали "Дӯстии ҷавонон", ки бахшида ба Наврӯзи байналмилалӣ ташкил гардидааст, аз 31 март оғоз гардида, то 5 апрел дар шаҳру ноҳияҳои вилояти Суғд идома меёбад.

Тибқи нақша дар доираи Фестивал ҳамоишу конференсияҳо, семинарҳо баргузор гардида, иштирокдорони он аз ҷойҳои таърихию сайёҳӣ дидан намуда истодаанд. Ҳамчунин, барномаҳои идонаю фарҳангӣ таҳти унвони “Шоми ҷавонӣ” роҳандозӣ гардида истодааст.

Субҳиддин ҚОДИРОВ, “ҶТ”