17 - уми сентябр раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад бо ҳамроҳии роҳбарияти Раёсати кор бо ҷавонон ва варзиши вилояти Суғд аз ҷараёни сохтмони маҷмааи варзишии “Суғд-Арена” дар шаҳри Хуҷанд боздид намуд.

Зимни шиносоӣ қайд карда шуд, ки маҷмааи мазкур яке аз иншооти бузурги варзишӣ дар вилояти Суғд маҳсуб ёфта, бо тарҳи замонавӣ ва ҷавобгӯ ба меъёрҳои байналмилалӣ бунёд шуда истодааст. Иншоот пас аз мавриди истифода қарор гирифтанаш шароити мусоидро барои баргузории мусобиқаҳои ҷумҳуриявию байналмилалӣ, тамрини варзишгарони касбӣ ва ҷалби ҳарчи бештари ҷавонон ба варзиш фароҳам меорад.

Раиси Кумита дар ҷараёни боздид таъкид намуд, ки дастгирӣ ва рушди соҳаи варзиш таҳти сиёсати хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавқеи хосса дошта, сохтмони чунин маҷмааҳои муосир қадами устувор дар самти таҳкими тарзи ҳаёти солим, баланд бардоштани сатҳи омодагии варзишгарон ва муаррифии шоистаи кишвар дар арсаи байналмилалӣ мебошад.

Ҳамзамон, ҷараёни иҷрои корҳои сохтмонӣ мавриди таваҷҷуҳи хосса қарор гирифта, ба масъулин дастур дода шуд, ки сифати корро баланд бардошта, муҳлати ба истифода супоридани маҷмааро риоя намоянд.

“ҶТ”