Бахшида ба 35-солагии Истиқлоли давлатии кишвар аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар шаҳри Роғун Фестивали ҷавонон ва кормандони НБО “Роғун” таҳти унвони “ROGUN FEST – 2026” оғоз гардид.

Дар ин хусус аз Кумитаи кор бо ҷавонон ва варзиш хабар доданд.

Раҳимзода Шабнам, муовини якуми раиси Кумита дар маросими ифтитоҳии фестивал аз нақши ҷавонон дар таҳкими Истиқлоли давлатӣ, ватандӯстӣ, худшиносии миллӣ ва тарғиби тарзи ҳаёти солим гуфт.

Ба гуфтаи масъулин фестивали мазкур бо мақсади фароҳам овардани фазои дӯстиву ҳамбастагӣ, ҷалби ҷавонон ба фаъолияти ҷамъиятӣ ва варзиш, инчунин дастгирии ташаббусҳои созандаи насли ҷавон баргузор мегардад.

Ба таъкиди онҳо дар доираи фестивал баргузории барномаҳои фарҳангӣ, озмунҳои зеҳнӣ ва мусобиқаҳои варзишӣ миёни ҷавонон ва кормандони НБО “Роғун” дар назар аст.


Гулафшон КАРИМОВА,“ҶТ”