Варзишгарони сарбаланд, мураббиён ва устодони гиромӣ, собиқадорони соҳа, кормандони муассисаҳои тарбияи ҷисмонӣ ва варзиш ва тамоми дӯстдорони варзиш!

Ҳамаи Шуморо ба муносибати Рӯзи варзишгарони Тоҷикистон самимона табрик гуфта, бароятон саломатии бардавом, неруи тоза, иродаи қавӣ ва комёбиҳои пайвастаро орзу менамоям.

Имсол ин санаи фархунда дар фазои омодагӣ ба таҷлили 35-солагии Истиқлоли давлатии Ҷумҳурии Тоҷикистон баргузор мегардад. Ин ҳамоҳангии ду рӯйдоди муҳим барои аҳли варзиш маънои хосса дорад, зеро дар тули сию панҷ соли соҳибистиқлолӣ варзиш на танҳо роҳи рушди худро тай кард, балки ба яке аз воситаҳои муассири муаррифии Тоҷикистон дар арсаи байналмилалӣ табдил ёфт.

Истиқлол ба миллати тоҷик имконият дод, ки бо такя ба сиёсати созандаи давлатӣ заминаҳои устувори рушди соҳаҳои гуногунро фароҳам оварад. Варзиш низ дар ҳамин раванди созанда ҷойгоҳи хос пайдо карда, имрӯз ба бахши муҳими сиёсати иҷтимоии давлат дар самти тарбияи насли солим, қавиирода ва ватандӯст табдил ёфтааст.

Дар ин роҳи пурифтихор таваҷҷуҳи пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон ба рушди варзиш ва дастгирии варзишгарон нақши муассир дорад. Таваҷҷуҳ, дастгирӣ ва пуштибонии Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ, ки дар доираи ҳамин сиёсати созанда сурат мегирад, низ ба рушди муҳити варзишӣ ва фароҳам гардидани имкониятҳои нав барои ҷавонон мусоидат намудааст.

Имрӯз дастоварди варзишгарони тоҷикро метавон яке аз чеҳраҳои дурахшони Тоҷикистони соҳибистиқлол донист. Вақте фарзанди миллат дар майдони байналмилалӣ ба қуллаи пирӯзӣ мерасад, номи Ватан садо медиҳад, Парчами давлатӣ парафшон мегардад ва Суруди миллӣ ба ифтихори ӯ танинандоз мешавад. Ин лаҳзаҳо эҳсоси ягонагӣ ва ифтихори миллиро дар қалби ҳар як шаҳрванди кишвар бедор мекунанд.

Дар ин дастовардҳо заҳмати фидокоронаи мураббиён ва устодон низ ҷойгоҳи махсус дорад. Онҳо на танҳо маҳорати варзишӣ, балки ирода, интизом, масъулият ва руҳияи муборизаро ба шогирдон меомӯзонанд. Ба ҳамаи онҳо ва собиқадорони соҳа барои хизмати содиқонаашон арзи эҳтиром ва сипоси самимӣ менамоям.

Дар асл, 35 соли Истиқлоли давлатӣ моро водор месозад, ки ба оянда бо масъулияти бештар назар кунем. Қаҳрамонони фардои варзиши тоҷик имрӯз дар байни кӯдакону наврасони мо ҳастанд. Вазифаи мо фароҳам овардани шароитест, ки истеъдоди онҳо рушд ёбад, меҳнаташон натиҷа диҳад ва орзуҳояшон ба пирӯзиҳои нав барои Тоҷикистон табдил ёбанд.

Бовар дорам, ки варзишгарони ҷавони мо анъанаи неки қаҳрамонони имрӯзаро идома дода, дар бузургтарин мусобиқаҳои ҷаҳон номи Тоҷикистони соҳибистиқлолро боз ҳам баландтар хоҳанд бардошт.

Ба ҳамаи масъулин, мураббиёну варзишгарон ва собиқадорони соҳаи тарбияи ҷисмонӣ ва варзиш саломатии комил, неруи созанда, матонати қавӣ ва пирӯзиҳои нав орзу менамоям.

Бигзор 35-солагии Истиқлоли давлатии Ҷумҳурии Тоҷикистон ва Рӯзи варзишгарон барои тамоми ҷомеаи кишвар ҷашни ифтихор аз Ватан, сарфарозӣ аз дастовардҳои миллӣ ва оғози қадамҳои устувор ба сӯи қуллаҳои боз ҳам баландтар бошад.

Истиқлоли давлатии Тоҷикистон поянда, сулҳу ваҳдати миллӣ устувор, Ватани азизамон ободу осуда, Парчами муқаддаси мо парафшон ва варзишгарони тоҷик ҳамеша сарбаланду пирӯз бошанд!

Рӯзи варзишгарони Тоҷикистон ва 35-солагии Истиқлоли давлатии Ҷумҳурии Тоҷикистон муборак бод!