6 июл раиси Кумитаи телевизион ва радиои назди Ҳукумати Ҷумҳурии Тоҷикистон Носир Саид зимни нишасти матбуотӣ изҳор дошт, ки пас аз таъсиси равзанаи ягонаи реклама ҳаҷми рекламаҳои пахшшаванда дар шабакаҳои телевизионии давлатӣ нисбат ба пеш коҳиш ёфтааст.

Ба гуфтаи ӯ, ин вазъ ба он вобаста аст, ки низоми нави пешниҳоди реклама дорои талаботи муайян буда, на ҳамаи роликҳои рекламавии пешниҳодшуда ба меъёрҳои муқарраршуда ҷавобгӯ мебошанд. Аз ин рӯ, қисми муайяни рекламаҳое, ки қаблан мустақиман дар шабакаҳои телевизионӣ пахш мешуданд, акнун аз марҳилаи интихоб нагузашта, ҳаҷми умумии реклама коҳиш ёфтааст.

Носир Саид таъкид кард, ки равзанаи ягонаи реклама бо мақсади ба танзим даровардани бозори реклама ва таъмин намудани тартиби ягонаи ҳамкорӣ бо фармоишгарон таъсис дода шудааст. Ба гуфтаи ӯ, дар айни замон Кумита барои такмил додани фаъолияти ин низом ва ҷалби ҳарчи бештари соҳибкорону ширкатҳои тиҷоратӣ тадбирҳои мушаххас меандешад.

Раиси Кумита афзуд, ки дар оянда бо такмили механизмҳои фаъолияти равзанаи ягона, содатар намудани расмиёти ҳамкорӣ ва ҷалби фармоишгарони нав, интизор меравад ҳаҷми реклама дар шабакаҳои телевизионӣ тадриҷан афзоиш ёбад.

Ёдовар мешавем, ки аз оғози соли ҷорӣ Кумитаи телевизион ва радиои назди Ҳукумати Ҷумҳурии Тоҷикистон равзанаи ягонаи рекламаи худро таъсис дод. Тибқи тартиби нав, ҳамаи ширкатҳо, соҳибкорон ва дигар фармоишгароне, ки хоҳиши пахши реклама дар шабакаҳои телевизионии давлатиро доранд, бояд аввал ба ҳамин равзана муроҷиат намоянд. Баъд аз баррасӣ ва мутобиқати маводи рекламавӣ ба талаботи муқарраршуда рекламаҳо миёни шабакаҳои телевизионӣ тақсим ва барои пахш ирсол мешаванд.

Масъулони Кумита бар ин назаранд, ки татбиқи чунин низом ба шаффофият, ҳамоҳангсозии фаъолияти рекламавӣ ва истифодаи самараноки имкониятҳои шабакаҳои телевизионии давлатӣ мусоидат хоҳад кард.

Я. МАҲМАДНАБИЕВ, “ҶТ”