Дар нимсолаи авали соли 2026 Агентии назорати давлатии молиявӣ ва мубориза бо корупсияи Ҷумҳурии Тоҷикистон аз рӯи ҳамаи самтҳои фаъолият дар маҷмуъ 331,4 милион сомонӣ зарар ошкор шудааст.

Дар ин хусус имрӯз - 22 июл Сулаймон Султонзода, директори Агентӣ зимни нишасти хабарӣ иттилоъ дод.

Бо барқарорсозии бақияи зарар бо парвандаҳои ҷиноятии соли гузашта, рӯёнидани маблағи бақияпулиҳои андоз ва таъини ҷаримаҳои маъмурӣ Агентӣ 449 милион сомонӣ барқарор кардааст, ки аз он 349,5 милион сомонӣ бевосита ба буҷети давлат рост меояд.

Ин рақам ба корхона ва ташкилоту муассисаҳои давлатӣ 87,1 милион сомонӣ ва ба ҷамъиятҳои ғайридавлатӣ ва шаҳрвандон 12,4 милион сомонӣ рост меояд .

Ба иттилои манбаъ, воҳидҳои ҳифзи ҳуқуқи Агентӣ 1321 ҷинояти коррупсионӣ ва иқтисодии хусусияти коррупсионидошта ва дигар ҷиноятҳои дар қонунгузорӣ пешбинишударо нисбати 711 нафар ошкор намуда, вобаста ба ин ҷиноятҳо 425 парвандаи ҷиноятӣ нисбати 504 нафар ба судҳо фиристонидаанд.

Шаҳноза АЗИМОВА, “ҶТ”