Имрӯз дар Донишгоҳи давлатии тиҷорати Тоҷикистон маросими ҷамъбастии озмуни ҷумҳуриявии маҷаллаи “Бонувони Тоҷикистон” бо номи “Фарзанди Тоҷикистонам” баргузор гардид, ки дар он аҳли қаламу эҷод ва иштирокчиёни фаъоли озмун иштирок карданд.

Зимни суханронӣ Шоҳона Одиназода, сармуҳаррири маҷаллаи “Бонувони Тоҷикистон” аз иштироки эҷодкорон дар озмуни “Фарзанди Тоҷикистонам” сипосгузорӣ намуда, аз ҷумла гуфт:
- Воқеан ҳам, қаламкашоне ки матлабҳои ҷолибу пурмуҳтаворо ба унвонии маҷалла ирсол доштанд, чун ғаввосони дарёи маонӣ аз умқи дил нигоштаҳои хешро дар васфи модарон, бонувони муваффақу нафъовари ҷомеа ҳам дар шакли наср ва ҳам назм рӯи авроқ рехтанд. Барои заҳматҳоятон сипосгузорам, зеро заҳматҳои шабонарӯзии зан – модари тоҷик сазовори ҳама гуна арҷгузориву эҳтиром аст.

Гуфта шуд, ки озмуни ҷумҳуриявии “Фарзанди Тоҷикистонам” бо мақсади бозтоб додани рӯзгори бонувони тоҷик ва мавқеи онҳо дар ҷомеаи имрӯз роҳандозӣ гардида, давоми қариб як сол идома кард, ки теъдоди зиёди қаламкашон дар он ширкат карданд.

Сипас ғолибони озмун эълон гардиданд. Ҳамин тавр Латофат Кенҷаева дар бахши назм ва Гулчеҳра Маҳмадиева дар бахши наср ғолиби озмуни "Фарзанди Тоҷикистонам" гаштанд.
Дар бахши наср ҷойи дуввум насиби Диловари Мирзо, Лутфуллои Азиз ва дар бахши назм ҷойи дуввум насиби Бузургмеҳри Баҳодур, Абдулқодири Раҳим ва Сафар Амирхон гардид.
Иштирокчиёни дигари озмун Ато Ҳамдам, Мухтор Абдулло ва Раҳматуллои Раҳмон дар бахши наср ва Субҳон Ҷалилов, Дилафрӯз Олимова дар бахши назм зинаи сеюмро касб карданд.
Ғолибони озмун бо мукофотҳо қадрдонӣ шуданд ва ба иштирокчиёни дигари озмуни маҷаллаи “Бонувони Тоҷикистон” сипоснома тақдим гардид.

Дар охир барномаи фарҳангӣ бо иштироки овозхонҳои шинохта пешкаши ҳозирин гардонида шуд.

Ардашери ПАЙВАНД, “ҶТ”