Рӯзҳои 4-5-уми июли соли 2026 дар Осоишгоҳи “Сароб”-и ноҳияи Варзоб бо иштироки рӯзноманигорон семинари омӯзишӣ таҳти унвони “Нақши ВАО дар инъикос ва фаҳмондадиҳии ҳадафҳои стратегии соҳаи алоқа” баргузор гардид.

Семинари мазкур бо ташаббуси Хадамоти алоқаи назди Ҳукумати Ҷумҳурии Тоҷикистон баргузор гардида, дар кори он як қатор рӯзноманигор аз нашрияҳои ҷумҳуриявӣ, шабакаҳои телевизионӣ ва радиоӣ, масъулони хадамоти матбуотии ширкатҳои алоқаи мобилӣ ва сохторҳои зертобеи Хадамоти алоқа иштирок намуданд.

Дар семинар роҳбарият ва мутахассисони Хадамоти алоқа, аз ҷумла муовини якуми Сардори Хадамоти алоқаи назди Ҳукумати Ҷумҳурии Тоҷикистон Парвиз Нориён, намояндагони ҶСК “Тоҷиктелеком”, Муассисаи давлатии “Маркази рушди рақамӣ ва алоқаи моҳвораӣ”, КВД “Почтаи Тоҷикистон”, КВД “Маркази мутобиқати электромагнитӣ ва радиомониторинг” ва дигар сохторҳои соҳавӣ иштирок ва суханронӣ намуданд.

Ба гуфтаи масъулин мақсад аз баргузории семинар ин баланд бардоштани сатҳи огоҳии намояндагони воситаҳои ахбори омма аз ҳадафҳо, вазифаҳо ва самтҳои афзалиятноки “Стратегияи рушди соҳаи алоқаи Ҷумҳурии Тоҷикистон барои давраи то соли 2040”, тақвияти ҳамкориҳо бо расонаҳо ва таъмини инъикоси касбӣ дар кишвар мебошад.

Дар оғози семинар нақши ВАО-ро дар баланд бардоштани маърифати рақамии ҷомеа, шарҳу тавзеҳи сиёсати давлатӣ муҳим ва калидӣ арзёбӣ намуданд.

Баъдан, Парвиз Нориён, муовини якуми Сардори Хадамоти алоқа “Стратегияи рушди соҳаи алоқа барои давраи то соли 2040”-ро муаррифӣ намуда, оид ба заминаҳои таҳияи он, афзалиятҳои миллӣ, нақши соҳаи алоқа ва ВАО-ро дар амалишавии ин Стратегияи рушди иқтисоди кишвар бисёр муҳим хонд.

- Сарчашмаи таҳияи ин Стратегия дар Паёми Президенти кишвар ба Маҷлиси Олӣ, ки моҳи декабри соли гузашта ироа гардида буд, мо вазифадор гаштем, ки якҷо бо вазорату идораҳои дахлдор дар таҳия ва заминаҳои рушди ин Стратегия талош кунем, - гуфт Парвиз Нориён.

Ҳамзамон таъкид гардид, ки талаботи ҷавонон ва умуман ҷомеа дар доштани интернети босифат афзоиш ёфтааст. Ҳамчунин, доштани интернети босифат ба мақомоту идораҳо имконият фароҳам меорад, ки дар расидан ба ҳадафи Стратегии кишвар қадами бузург гузоранд.

Семинар аз се бахши асосӣ иборат буд. Модули якум ва дуюм ба рушди инфрасохтори алоқаи собит, шабакаҳои нахию нурӣ, масъалаҳои рушди алоқаи мобилӣ, ҷорӣ намудани технологияҳои насли панҷуми алоқа (5G), идоракунии самараноки спектри радиобасомадҳо, рушди долонҳои рақамӣ, таҳкими иқтидори транзитии Тоҷикистон ва истифодаи имкониятҳои алоқаи моҳвораӣ бахшида шуд.

Дар рӯзи дигар, яъне қисмати охири семинар ба масъалаҳои табдили рақамии соҳаи почта, рушди хизматрасониҳои логистикӣ, ҳифзи инфрасохтори рақамӣ, амнияти киберӣ, ҳифзи маълумот ва таҳкими соҳибихтиёрии рақамии Ҷумҳурии Тоҷикистон равона шуд.

Баъдан, миёни намояндагони ВАО ва роҳбарону маърузачиёни семинар суҳбати озод сурат гирифт. Ҳамчунин, аз ҷониби ташкилкунандагони семинар “Клуби журналистони соҳаи алоқа ва иқтисоди рақамӣ” баҳри инъикоси мунтазами раванди татбиқи “Стратегияи рушди соҳаи алоқа барои давраи то соли 2040” таъсис дода шуд, ки аз ҷониби намояндагони ВАО пазироӣ гардид.

Дар охир ба намояндагони ВАО барои иштирок дар семинар сертификатҳо супорида шуд.

С.ИБОДЗОДА, “ҶТ”