Имрӯз дар шаҳри Душанбе мулоқоти Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо Ёгеш Десай, сардори бахши Федератсияҳои Осиёи Марказии Конфедератсияи футболи Осиё (AFC) доир шуд.

Тибқи иттилои маркази таҳлил ва иттилооти Кумита, дар ҷараёни вохӯрӣ ҷонибҳо масъалаҳои марбут ба рушди футбол дар Тоҷикистон ва минтақаи Осиёи Марказӣ, густариши ҳамкории судманд бо Конфедератсияи футболи Осиё ва татбиқи барномаҳои таълимиву инфрасохториро мавриди баррасӣ қарор доданд.

Зулфиқор Гулаҳмадзода, раиси КҶВ таъкид намуд, ки футбол яке аз варзишҳои дӯстдоштаи ҷавонон дар Тоҷикистон ба ҳисоб рафта, Ҳукумати Ҷумҳурии Тоҷикистон таҳти роҳбарии Пешвои миллат муҳтарам Эмомалӣ Раҳмон барои рушди он таваҷҷуҳи хос зоҳир менамояд. Дар ҳамин замина, нақши Федератсияи футболи Тоҷикистон таҳти роҳбарии муҳтарам Рустами Эмомалӣ низ ҷиҳати расидан ба дастовардҳои намоён дар сатҳи миллӣ ва байналмилалӣ муҳим арзёбӣ гардид.

Ёгеш Десай аз ҳамкории созанда бо Тоҷикистон изҳори қаноатмандӣ намуда, омодагии Конфедератсияи футболи Осиёро барои дастгирӣ дар самтҳои гуногун, аз ҷумла рушду такмили инфрасохтори футбол, барномаҳои таълимии мураббиёну доварон, футбол миёни ҷавонон ва занон, ҳамчунин ташкили мусобиқаҳои қитъавӣ дар Тоҷикистон баён дошт.

Дар анҷоми мулоқот ҷонибҳо омодагии худро барои таҳкими ҳамкорӣ ва татбиқи лоиҳаҳои муштарак ба хотири рушди футбол ва тарғиби тарзи ҳаёти солим миёни ҷавонон таъкид карданд.

“ҶТ”