Шоми 11 май дар доираи нақшаи баргузории силсилаи чорабиниҳои идонаи фарҳангӣ, ки аз ҷониби муассисаҳои таҳсилоти олии касбӣ ва миёнаи касбии ҳудуди шаҳри Душанбе роҳандозӣ гардидааст, чорабинии фарҳангӣ – фароғатӣ таҳти унвони “Базми ҷавонӣ” бахшида ба Рӯзи ҷавонони Тоҷикистон ва ҷашни 35-солагии Истиқлоли давлатии Ҷумҳурии Тоҷикистон дар Боғи фарҳангӣ-фароғатии ба номи А. Фирдавсӣ баргузор гардид.

Тибқи иттилоъ, чорабинии мазкур бо ибтикори Донишгоҳи давлатии тиҷорати Тоҷикистон баргузор шуда, дар он масъулини Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва муассисаи мазкур иштирок ва суханрониӣ намуданд.

Зимни суханрониҳо таъкид гардид, ки баргузории чунин чорабиниҳо ба фароҳам овардани муҳити созгори фарҳангиву фароғатӣ, тақвияти неруи зеҳнӣ ва эҷодии ҷавонон, баланд бардоштани сатҳи маърифати фарҳангӣ ва таҳкими эҳсоси худшиносиву ифтихори миллӣ мусоидат менамояд.

Чорабинӣ дар фазои тантанавӣ ва руҳияи баланди идона ҷараён гирифта, иштирокдорон бо эҳсоси гарми ватандӯстӣ, ҳамдигарфаҳмӣ ва ифтихори миллӣ фароғат намуданд.

“ҶТ”