Имрӯз дар Маркази миллии қонунгузории назди Президенти Ҷумҳурии Тоҷикистон нишасти хабарӣ баргузор гардид. Директори Марказ Изаттулло Саидзода зимни нишаст аз натиҷаҳои фаъолияти муассиса дар нимсолаи якуми соли 2026 иттилоъ дод.

Зикр гардид, ки дар самти мутобиқсозии санадҳои меъёрии ҳуқуқии амалкунанда ба санадҳои қонунгузорӣ 6 санади меъёрии ҳуқуқӣ мавриди омӯзишу таҳлил қарор гирифта, дар натиҷа 84 пешниҳоди илмӣ таҳия шудааст.

Ба иттилои роҳбарияти Марказ, дар давраи ҳисоботӣ аз мақомоти давлатӣ, вазорату идораҳо 123 лоиҳаи санадҳои меъёрии ҳуқуқӣ барои гузаронидани экспертизаи ҳуқуқӣ ворид гардидааст. Дар натиҷаи баррасии онҳо барои такмили мазмуну муҳтаво, асоснокии илмиву амалӣ ва мушаххас намудани механизмҳои таҳияву татбиқи қонунҳо ба субъектҳои ҳуқуқэҷодкунанда 512 пешниҳод ирсол шудааст.

Ҳамзамон, бо супориши мақомоти болоӣ ва инчунин бо ташаббуси худи Марказ дар ин давра 6 лоиҳаи санадҳои меъёрии ҳуқуқӣ таҳия гардидааст.

Гулафшон КАРИМОВА, “ҶТ”