Дар муассисаҳои таҳсилоти миёна ва ибтидоии касбии кишвар норасоии адабиёти таълимӣ яке аз мушкилиҳои асосии соҳа ба ҳисоб меравад. Дар ин хусус имрӯз - 3 феврал Фарҳод Раҳимӣ, раиси Кумита оид ба таҳсилоти ибтидоӣ ва миёнаи касбӣ иттилоъ дод.

Ба қавли раиси Кумита то ҳол норасоии китобҳои дарсӣ ва маводи таълимӣ ба мушоҳида мерасад, аммо барои рафъи ин мушкил тадбирҳои мушаххас андешида шуда истодааст.

Тибқи маълумот, дар муассисаҳои таҳсилоти миёнаи касбӣ 123 ҳазору 537 нусха китоби дарсӣ ва 128 ҳазору 889 нусха китобҳои тахассусию умумӣ дастрас аст.

- То имрӯз 30 номгӯи китобҳои дарсии зинаи таҳсилоти миёнаи касбӣ барои чоп омода гардида, 15 номгӯи дигар ба теъдоди 6010 нусха чоп ва ба муассисаҳои таълимӣ дастрас карда шудааст,-гуфт раиси Кумита.

Инчунин, раиси Кумита зикр кард, ки ин ҳолат таҳти назорати қатъӣ қарор дошта, дар муддати наздик бартараф хоҳад шуд.

- Мо кӯшиш мекунем, ки дар якуним соли оянда тамоми китобҳои тахассусиро таҳия ва дастраси донишомӯзон намоем,-гуфт раиси Кумита.

Ҳамзамон зимни нишасти хабарӣ гуфта шуд, ки сатҳи сифати дониши хонандагони муассисаҳои таҳсилоти миёнаи касбӣ 38,7% ва сатҳи донишандӯзӣ 77,3%-ро ташкил медиҳад, ки нисбат ба соли гузашта нишондиҳандаҳо беҳтар шудаанд. Аз ҷумла, сифати дониш 5,4 фоиз ва сатҳи донишандӯзӣ 2,7 фоиз афзоиш ёфтааст.

Фарзонаи УМАРАЛӢ, “ҶТ”