Форуми байналмилалие, ки сармоягузорони хориҷиро ба ҳам овард

Имрӯз дар Кохи фарҳанги шаҳри Бохтар форуми "Хатлон Инвест" ба кори худ оғоз намуд.

Дар ин бора рӯзномаи “Хатлон” - нашрияи Мақомоти иҷроияи ҳокимияти давлатии вилояти Хатлон хабар додааст.

Бино ба иттилои манбаъ, дар форум Давлаталӣ Саид, раиси вилояти Хатлон ва меҳмонон аз дохил ва хориҷи кишвар иштироку суханронӣ намуданд.

Гуфта мешавад, форум беш аз 400 иштирокчиёнро, аз ҷумла, истеҳсолкунандагони маҳсулоти кишоварзӣ аз вилояти Хатлон, намояндагони мақомоти давлатӣ ва харидорон аз кишварҳои Қазоқистон, Узбекистон, Афғонистон, Покистон, Британияи Кабир ва Озарбойҷон ҷамъ овардааст, ки барои рушди савдо ва содироти маҳсулоти кишоварзии Тоҷикистон мусоидат хоҳад кард.

Ба таъкиди масъулин форумҳои “Хатлон Инвест” ва “Бохтар Фуд-2024” дар таъсиси равобити бозорӣ, рушди муколама байни бахши давлатӣ ва хусусӣ ва ҷалби сармоягузорӣ ба кишвар нақши муҳим мебозад.