Дар доираи нақшаи ягонаи чорабиниҳои тарбияи ҷисмонӣ ва варзиш дар Ҷумҳурии Тоҷикистон барои соли 2026 бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Федератсияи тенниси рӯи мизи Тоҷикистон мусобиқаи ҷумҳуриявӣ оид ба тенниси рӯи миз барои дарёфти “Ҷоми Федератсияи тенниси рӯи мизи Тоҷикистон” ифтитоҳ гардид.

Тибқи иттилоъ, дар маросими ифтитоҳи мусобиқа раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад, раиси Федератсияи тенниси рӯи мизи Тоҷикистон Арабзода Нуралӣ Сайвалӣ, ҳамчунин дигар меҳмонон иштирок намуданд.

Зимни суханрониҳо оид ба таваҷҷуҳ ва ғамхории доимии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон нисбат ба рушди соҳаи тарбияи ҷисмонӣ ва варзиш, фароҳам овардани шароити мусоид барои варзишгарон ва дастгириҳои пайвастаи давлат ибрози назар карда шуд.

Дар мусобиқа зиёда аз 200 нафар варзишгар аз шаҳру ноҳияҳои гуногуни кишвар иштирок намуда, барои ба даст овардани натиҷаҳои баланд ва ҷоизаҳои ифтихорӣ байни ҳам рақобат менамоянд.

“ҶТ”